Тэлефонная лінія старшыні Камітэта дзяржкантроля з жыхарамі Ваўкавышчыны

На гэтым тыдні тэлефонную лінію з жыхарамі раёна правёў старшыня Камітэта дзяржаўнага кантролю Рэспублікі Беларусь Аляксандр Якабсон. Абумоўленая яна была тым, што з раёна ўзрасла колькасць скаргаў «наверх».

Каментар

Павелічэнне скаргаў у рэспубліканскія органы ўлады сведчыць аб узрастанні недаверу да мясцовых органаў улады, асабліва мясцовых саветаў. Большасць пытанняў, з якімі звярталіся грамадзяне да старшыні КДК, вырашаюцца на ўзроўні дэпутатаў рай- або сельсаветаў, задача якіх кантраляваць мясцовыя выканаўчыя і распарадчыя органы.

Пры гэтым, у дзяржаўнай рэгіянальнай прэсе быў надрукаваны дастаткова крытычны матэрыял у адносінах да мясцовых чыноўнікаў. Беларускае кіраўніцтва спрабуе адцягнуць ўвагу насельніцтва ад асобы дзейснага прэзідэнта і сацыяльна-эканамічных праблем шляхам перанакіравання раздражнення грамадзян на мясцовых чыноўнікаў. Улады ўсё болей сур’ёзна ставяцца да маніторынгу грамадскага меркавання і “тушэнню” незадаволенасці ў найбольш праблемных рэгіёнах.

Адным з спосабаў змяншэння напружанасці ў праблемных рэгіёнах у сітуацыі, калі беларускае кіраўніцтва не знаходзіць выйсця з сацыяльна-эканамічнага крызісу, з’яўляецца перкладанне адказнасці на мясцовае кіраўніцтва з наступнай яго заменай і шырокага інфармацыйнага суправаджэння гэтых падзей у рэгіянальных СМІ. Акрамя таго, замест рэальнага зняцця з пасадаў сярод насельніцтва могуць распаўсюджвацца чуткі аб тым, што “прэзідэнт” незадаволены працай кіраўніка мясцовай адміністрацыі, які ў хуткім часе будзе зняты з пасады (напр., Масты).

Не выключаны варыянт, калі прэзідэнская адміністрацыя вырашыць задзейнічаць кадравыя перастаноўкі сярод кіраўніцтва раённых адміністрацый болей шырока, што сапраўды будзе мець станоўчы эфект на імідж беларускага кіраўніцтва.