Рэжымныя ахоўнікі ўзмацняюць рэпрэсіі, кіруючы клас аднаўляе ўліванні ў дзяржсектар

Вышэйшае кіраўніцтва прытрымліваецца намераў аднавіць маштабныя ўліванні ў дзяржсектар у рамках імпартазамяшчэння. Кіруючы клас кансалідуе чыноўніцкую вертыкаль пагрозай смяротнага пакарання, прапагандысты пагражаюць новай хваляй унутраных чыстак у дзяржсектары, а ахоўнікі рэжыму распачынаюць чарговую маштабную кампанію рэпрэсій у адносінах да іншадумцаў.

Вышэйшае кіраўніцтва працягвае папулісцкае ўмяшанне ў цэнавае рэгуляванне для захавання асабістых рэйтынгаў у насельніцтва. На ўрадавам паседжанні Лукашэнка запатрабаваў не дапускаць скачка цэн і ўтрымаць інфляцыю на ўзроўні 7% гадавых.

У выніку ручнога рэгулявання цэнаўтварэння і ўмяшання ахоўнікаў рэжыму працягваецца пераразмеркаванне рынку рытэйлу на карысць найбольш лаяльнага і набліжанага да кіруючага класа бізнесу.

Лукашэнка спрабуе дыстанцыянавацца ад чыноўнікаў, перакласці адказнасць за эканамічныя праблемы і незадаволенасць насельніцтва на ўрад.

Адначасова кіруючы клас спрабуе кансалідаваць вертыкаль пагрозай смяротнага пакарання за здраду дзяржаве Лукашэнкі.

Падаткавікі канцэнтруюць сваю ўвагу і высілкі на праверцы і экспрапрыяцыях у прыватных перавозчыкаў.

Ахоўнікі рэжыму актывізуюць пераслед і зачыстку актывістаў пратэснага руху ў рэгіёнах пасля дыверсіі на вайсковым аэрадроме ў Мачулішчах. Толькі за адзін дзень ГУБАЗіК затрымаў больш за 60 чалавек.

Прапагандысты ўзмацняюць мову варожасці ў адносінах да апанентаў рэжыму Лукашэнкі, а таксама спрабуюць ініцыяваць новую хвалю чыстак і рэпрэсій у грамадстве з абмежаваннем у правах іншадумцаў.

Кіруючы клас дэманструе адсутнасць намераў дыялогу і пошуку кампрамісу ў супрацьстаянні з апанентамі рэжыму. Вынесены вялікія турэмныя тэрміны лідарам дэмакратычных сіл: Святлане Ціханоўскай – 15 гадоў калоніі, Паўлу Латушку – 18. Марыя Мароз, Вольга Кавалькова і Сяргей Дылеўскі атрымалі па 12 гадоў пазбаўлення волі.

Урад захоўвае асобныя ўмовы сацыяльнага кантракту з насельніцтвам – як, напрыклад, адносна невысокія кошты на жыллёва–камунальныя паслугі за кошт дзяржсубсідый.

Аднак узровень дабрабыту змяншаецца, і насельніцтва пачынае праядаць валютныя назапашванні.

Урад разлічвае стымуляваць эканоміку за кошт бюджэтных уліванняў і інвестыцый у дзяржпраекты ў рэгіёнах. Саўмін абавязаў усе раёны запусціць да 2025 года па адным інвестпраекце. Некаторыя інвестпраекты цэнтралізавана навязваюцца ўрадам і ўжо загадзя ацэньваюцца мясцовымі чыноўнікамі як патэнцыйна стратныя.

Прыхільнікі маштабных дзяржаўных інвестыцый маюць падтрымку ў вышэйшага кіраўніцтва. Лукашэнка патрабуе стварыць новыя працоўныя месцы ў рамках імпартазамяшчэння.

Такім чынам, рэжым Лукашэнкі актывізуе чысткі і рэпрэсіі ў адносінах да прыхільнікаў перамен. Па ўсёй верагоднасці, кіруючы клас працягне ўзмацняць жорсткасць рэпрэсіўнага заканадаўства.