Выбары ў Каардынацыйную раду: паўфінал барацьбы за лідарства ў дэмакратычным руху

Выбарчая кампанія ў Каардынацыйную раду (КР) павялічвае напружанасць і суперніцтва сярод палітарганізацый. Па выніках выбараў КР можа павялічыць уплыў на фармаванне парадку дня дэмакратычнага руху. Калі выбарчы спіс на чале з Паўлам Латушкам атрымае большасць месцаў, КР можа стаць самастойным гульцом і кінуць выклік Святлане Ціханоўскай у барацьбе за лідарства сярод дэмакратычных сіл.

Кіраўнік Народнага антыкрызіснага кіравання (НАК) і намеснік кіраўніцы Аб’яднанага пераходнага кабінета (АПК) Павел Латушка сфармаваў найбольш прадстаўнічы спіс вылучэнцаў у новы склад КР. З улікам асабістай папулярнасці сярод апанентаў рэжыму палітык разлічвае атрымаць большасць месцаў у КР па выніках выбараў.

Латушка перыядычна адрасуе крытыку блізкаму атачэнню і офісу Святланы Ціханоўскай. Палітык не ставіць пад сумнеў яе лідарства. Аднак часам выкарыстоўвае публічныя каналы для ціску на дэмакратычную лідарку па асобных пытаннях — напрыклад, наконт выбараў у КР.

Пры гэтым, атрыманне большасці месцаў у КР новага склікання дазволіць Латушку ўмацаваць пазіцыі, дыстанцыянавацца ад Ціханоўскай і кінуць ёй выклік у будучым.

Выбары ў КР і палітычныя амбіцыі асобных ваяроў Палка Каліноўскага ўвайшлі ў супярэчнасць з намерамі іншых калег-добраахвотнікаў. У выніку прадстаўнікі Палка Каліноўскага адмовіліся ад наўпроставага ўдзелу ў выбарах. Хаця ініцыяваны часткай добраахвотнікаў ПК выбарчы спіс працягнуў змаганне за галасы.

Хутчэй за ўсё, дэмакратычныя сілы прыцягнуць увагу актывістаў дыяспар да галасавання ў новы склад КР. Гэта павялічвае шанцы жорсткіх крытыкаў і прыхільнікаў сілавых сцэнароў змены рэжыму Лукашэнкі заняць большасць месцаў у КР ІІІ-га склікання.

Абмежавальным фактарам для ўдзелу ў галасаванні шырокай аўдыторыі з Беларусі з’яўляюцца рэпрэсіі і супрацьдзеянне ахоўнікаў рэжыму. Шэраг выбарчых спісаў ужо прызнаныя рэжымам Лукашэнкі “экстрэмісцкімі фармаваннямі”, заведзены шэраг крымінальных спраў у адносінах да чальцоў КР.

Такім чынам, выбары ў Каардынацыйную раду падтрымліваюць палітарганізацыі ў электаральным тонусе і забяспечваюць зваротную сувязь з іх аўдыторыямі.