Грамадзянская супольнасць прасоўвае інтарэсы студэнтаў у Эстоніі, звужэнне аўдыторыі дэмакратычных сіл унутры Беларусі

У грамадзянскай супольнасці актывізуецца дыскусія наконт стратэгіі дэмакратычных перамен і магчымых перамоў з рэжымам Лукашэнкі на фоне несупынных рэпрэсій. Прыхільнікі сілавога сцэнару палітычных перамен у Беларусі ўзмацняюць свае пазіцыі ў незалежнай медыяпрасторы.

У незалежных медыя аднаўляецца дыскусія наконт агульнай стратэгіі грамадзянскай супольнасці ў адносінах да рэжыму Лукашэнкі. Голас крытыкаў жорсткага санкцыйнага ціску дэмсіл на чале з Святланай Ціханоўскай узмацняецца на фоне працяглай хвалі рэпрэсій унутры Беларусі і пастаяннага павелічэння колькасці палітзняволеных.

Скандалы, звязаныя з бяспекай і ўцечкай асабістых звестак, працягваюць уплываць на змяншэнне даверу да незалежных медыя і грамадскіх ініцыятыў. Сілавікі заявілі аб уцечцы дадзеных з NEXTA. Аўдыторыя незалежных медыя працягвае паступова скарачацца.

Дэмсілы на чале з Ціханоўскай дабіваюцца поспеху ў прасоўванні інтарэсаў беларускіх студэнтаў у Эстоніі. Студэнты змогуць паступаць ва ўніверсітэты і працягваць навучанне ў Эстоніі.

Аўтаномная сеткавая ініцыятыва “Народныя амбасады Беларусі” пашыраюць сваё прадстаўніцтва на Італію і Ізраіль, што павялічвае патэнцыял па адвакатаванні інтарэсаў беларусаў і кансультацыі эмігрантаў.

Дэмсілы ў кааперацыі з Варшаўскім універсітэтам запусцілі праграму па падрыхтоўцы дзяржслужбоўцаў для Беларусі пасля дэмакратычных перамен.

Антываенны супраціў не спыняецца нягледзячы на жорсткія рэпрэсіі і пакаранні за любыя публічныя праявы пазіцыі супраць вайны. Папулярны праект “Беларускі Гаюн” працягвае бесперапынны маніторынг ваеннай актыўнасці на тэрыторыі Беларусі, а колькасць падпісчыкаў ягонага канала ў Telegram павялічылася за апошні месяц.

Добраахвотнікі ва Украіне ўзмацняюць свае пазіцыі ў інфармацыйнай павестцы незалежных медыя. Полк Каліноўскага разлічвае стаць асобным палітычным цэнтрам і працягвае дыстанцыявацца ад Кабінета Ціханоўскай.

Такім чынам, сярод дэмакратычнай супольнасці актывізуецца абмеркаванне перагляду падыходу ў адносінах да рэжыму Лукашэнкі з крытыкай жорсткіх пазіцый Кабінету Святланы Ціханоўскай.