Дэмсілы кансалідуюць жорсткіх крытыкаў рэжыму, папулярнасць сілавога сцэнару павялічваецца

Дэмсілы ўзмацняюць жорсткасць рыторыкі ў адносінах да рэжыму Лукашэнкі ў адказ на жорсткія прысуды дэмакратычным лідарам і ўзмацненне рэпрэсій у краіне. Кабінет Ціханоўскай працягвае кансалідаваць жорсткіх апанентаў кіруючага ў Мінску класу з узмацненнем пазіцый прыхільнікаў сілавога сцэнару перамен у Беларусі.

Санкцыйны ціск знаходзіць асаблівы водгук з боку кіраўніцтва Польшчы, якая разам з Літвой, з’яўляецца краінай ЕС найбольш зацікаўленай ў беларускай павестцы і падтрымцы патрабаванняў беларускіх дэмсіл.

Папулярнасць сілавога сцэнару палітычных перамен у краіне сярод апанентаў рэжыму павялічваецца, як і падтрымка добраахвотнікаў ва Украіне з палка Каліноўскага і яго лідараў, а таксама сілавых ініцыятыў дэмсіл.

Кааліцыя дэмсіл на чале з Святланай Ціханоўскай працягвае камунікацыю з палком Каліноўскага ў спробах наладзіць узаемадзеянне.

АПК замацоўвае стратэгію санкцыйна–эканамічнага прымуса рэжыму Лукашэнкі да спынення рэпрэсій і ўдзелу ў агрэсіі Крамля супраць Украіны, а таксама правядзення новых выбараў.

На сустрэчы з дыпламатамі ў Лондане Святлана Ціханоўская заявіла пра недапушчальнасць адмены санкцый супраць калійнага сектару Беларусі.

Лідар дэмакратычнай Беларусі правяла сустрэчы з шэрагам брытанскіх палітыкаў і замацавала ўвагу да беларускай павесткі на міжнародным узроўні, у тым ліку – на дэлегітымізацыі рэжыму Лукашэнкі і санкцыях.

Уплыў дэмсіл на ўнутраную павестку скарачаецца, што часткова звязана з абмежаваннямі ў медыйным доступе да аўдыторыі ўнутры краіны і рэпрэсіямі. У выніку палітарганізацыі канцэнтруюць высілкі на міжнароднай актыўнасці і ўнутрыарганізацыйным развіцці.

Каардынацыйная рада працягвае ўнутранае рэфармаванне і выбары новага кіраўніцтва пасля кааптацыю ў гэтую інстытуцыю дэмсіл прадстаўнікоў ад шырокага кола грамадзянскіх ініцыятыў. Аднак зацікаўленасць да рэфармавання і ўдзелу ў дзейнасці КР праяўляюць у большай ступені палітэміграцыя і дыяспары.

БСДП (Грамада) спрабуе паўплываць на навацыі ў закон “Аб палітычных партыях” і звяртаецца ў Канстытуцыйны суд.

Такім чынам, сярод прыхільнікаў дэмсіл працягне павялічвацца папулярнасць сілавога сцэнару перамен як рэакцыя на новую хвалю рэпрэсій з боку рэжыму Лукашэнкі.