Дэмсілы аддаляюцца ад унутрыбеларускага парадку дня

Палітычныя арганізацыі пагаршаюць камунікацыю з унутрыбеларускай аўдыторыяй. Гэта адбываецца з-за звужэння зваротнай сувязі і дэпалітызацыі насельніцтва ў выніку аўтарытарнай рэакцыі. Дэмакратычныя сілы канцэнтруюць высілкі на найбольш перспектыўных кірунках утрымання прыхільнікаў: камунікацыі з замежнымі партнерамі і адстойвання інтарэсаў беларусаў у замежжы. Святлана Ціханоўская прыцягвае замацоўваць дыпламатычныя поспехі і замяшчаць афіцыйную дыпламатыю Лукашэнкі на постсавецкай прасторы. 

Дэмсілы падвышаюць узровень кантактаў з кіраўніцтвам Арменіі на фоне напружанасці між афіцыйным Мінскам і Ерэванам. Лідарка дэмакратычнай Беларусі Ціханоўская сустрэлася ў Вільні з міністрам замежных спраў Арменіі Мірзаянам. Дыпламатычныя поспехі дэмсіл на постсавецкай прасторы выклікаюць сур’ёзную занепакоенасць рэжыму Лукашэнкі. Пасля сустрэчы Ціханоўскай з кіраўніком армянскага МЗС Арменіі перадалі ноту.

Дэмсілы пашыраюць кантакты з кіраўніцтвам постсавецкай прасторы і прасоўваюць свой парадак дня. У прыватнасці, акцэнт робіцца на ізаляцыі рэжыму Лукашэнкі і захаванні кантактаў з грамадствам. Нагадаем, што ў 2023 годзе Ціханоўскай наведала з афіцыйным візітам Малдову.

Каардынацыйная Рада пасля сканчэння выбарчай кампаніі сутыкнулася з чарговым унутраным крызісам. Паміж рознымі фракцыямі павялічылася напружанасць, выбухнуў шэраг медыйных скандалаў і канфліктаў. Палітарганізацыі канцэнтруюцца на ўнутрыарганізацыйных працэдурах  — і тым самым пагаршаюць камунікацыю са сваімі аўдыторыямі.

У выніку дыстанцыя дэмсіл ад унутрыбеларускага парадку дня працягвае павялічвацца. Рыторыка палітарганізацый супадае з чаканнямі вузкай аўдыторыі актывістаў, якія часцей за ўсе знаходзяцца ў эміграцыі. Гэта звязана з дэпалітызацыяй беларускага грамадства ў выніку рэпрэсій. Прадэмакратычныя палітыкі сутыкаюцца з недахопам бяспечных механізмаў па заахвочванні актывістаў унутры краіны і мабілізацыі сваіх аўдыторый на палітычнае дзеянне.

Такім чынам, дэмсілы працягнуць спробы перадухіліць пагаршэнне грамадскай думкі ў краінах ЕС і на постсавецкай прасторы ў адносінах да беларусаў з-за дзеянняў рэжыму Лукашэнкі.