Выбары на фінішнай прамой: усё ідзе па плане

Зарэгістраваныя кандыдаты ў прэзідэнты падкрэсліваюць прывабнасць Лукашэнкі. Дыктатар мусіць выглядаць як мудры і дасведчаны кіраўнік на фоне эксцэнтрычнага Гайдукевіча, сталініста Сыранкова, пасрэднага Хіжанкова і маргінальнай Канапацкай. Ідэолагі працягваюць навязваць свой фармат стасункаў з грамадзянскай супольнасцю і падвышаюць грамадскую вядомасць перабежчыкаў ад дэмакратычных сіл. Адбываецца рост напружанасці паміж Цэнтрвыбаркамам і актывістамі “рускага свету”.

Камуніст Сыранкоў прапануе аднавіць помнікі Іосіфу Сталіну і ўзмацніць чысткі ў дзяржсектары, цэнзуру і ідэалагізацыю, а таксама зрабіць больш маштабнымі маёмасныя экспрапрыяцыі ў іншадумцаў. Лідар прарэжымных “лібералаў” Гайдукевіч імкнецца пераняць эпатажны стыль легендарнага кіраўніка ЛДПР Жырыноўскага. Экс-дэпутатка парламента і прарэжымная апазіцыянерка Канапацкая крытыкуе Расію і Ціханоўскую, але не чапае Лукашэнку. Старшыня РПТС Хіжняк ўвогуле нічым асабліва не выдзяляецца, чым і робіць свой важны ўнёсак у кандыдацкую масоўку.

Прапагандыст Васкрасенскі агучыў прозвішчы пяці палітвязняў, якія выйшлі на волю па памілаванні. Блогер Пратасевіч апублікаваў у тэлеграм-канале фота з сустрэчы з Віктарам Бабарыкам. Адначасова сілавікі імкнуцца знішчыць інфраструктуру салідарнасці і падтрымкі палітвязняў. Так, сэрвіс “Письмо.бел” для ліставання з асуджанымі прызнаны па-за законам. Гэтыя захады падтрымліваюць напружанасць у дэмсілах з узмацненнем крытыкаў кааліцыі Ціханоўскай у спробе размывання адзінага парадку дня дэмсіл.

Прарасійскія актывісты імкнуцца вызначаць моўную палітыку дзяржавы. Іх інтарэсы працягваюць пярэчыць манаполіі кіруючага класа на вызначэнне дзяржаўнага курсу ў нацыянальна-культурнай сферы. Пры гэтым экс-лідара кампартыі Беларусі, а зараз кіраўніка ЦВК Ігара Карпенку наўрад ці можна назваць прыхільнікам беларускай мовы. Тым не менш інфаказачка Бондарава крытыкуе былога партыйнага паплечніка за ігнараванне рускай мовы на выбарчых бюлетэнях.

Кіруючы клас спрабуе кансалідаваць лаялістаў праз дадатковыя гарантыі і ільготы. Плануецца асобы парадак узбуджэння крымінальных спраў супраць дэлегатаў УНС.

Ідэолагі і сілавікі ўзмацняюць кампанію па запалохванні іншадумцаў напярэдадні галасавання. Акрамя адміністрацыйных арыштаў сілавікі праводзяць прафілактычныя гутаркі з актывістамі і ладзяць ідэалагічныя акцыі на дзяржпрадпрыемствах. Ахоўнікі рэжыму дэматывуюць апанентаў удзельнічаць у галасаванні з-за апаскі некантралюемых наступстваў.

Кіруючы клас выпрабоўвае дадатковыя захады па ізаляцыі ўнутранай інфармацыйнай прасторы падчас выбараў. У Беларусі ўначы ідуць тэсты абмежаванні ў доступе да інтэрнэту для шараговых карыстальнікаў. Улады не хочуць паўтарыць досвед 2020 года, калі эканоміка панесла значныя страты з-за тэрміновага адключэння Інтэрнэту па загадзе Лукашэнкі ў адказ на пратэсты.

Такім чынам, Лукашэнка працягне вызваленне палітзняволеных пасля выбарчай кампаніі і спробы разбурыць адзінства дэмсіл, каб падвысіць свае пазіцыі ў перамоўным працэсе з заходнімі сталіцамі.