en
Люты 19 – Люты 25, 2024
Кіруючы клас

Выбары без выбару. Лукашэнка рэпеціруе прэзідэнцкую кампанію?

Сітуацыя не змянілася
Выбары без выбару. Лукашэнка рэпеціруе прэзідэнцкую кампанію?
Карыкатура: dw.com

Кіруючы клас купіруе перадумовы пратэснай мабілізацыі грамадства супраць фальсіфікацыі вынікаў галасавання. Арганізатары выбараў забараняюць незалежнае назіранне і ўзмацняюць пераслед за альтэрнатыўны падлік галасоў. Ахоўнікі рэжыму спрыяюць абсентэізму і дэпалітызацыі прыхільнікаў перамен жорсткімі рэпрэсіямі, а таксама адсутнасцю кандыдатаў ад апазіцыйных палітарганізацый.

Выбары застаюцца важным механізмам унутранай легітымізацыі кіруючага класа. Арганізатары выбараў ініцыявалі маштабныя захады па прымусу выбаршчыкаў да пэўных электаральных паводзін, выхад за рамкі якіх жорстка караецца. Гэты падыход уключае маштабную яўку, адсутнасць канкурэнцыі (апазіцыі рэжыму) і абсентэізм апанентаў.  Найбольшая ўвага ў прымусе да аўтарытарнай мадэлі электаральных паводзін надаецца моладзі, работнікам дзяржсектара і бюджэтнікам.

Нягледзячы на скасаванне парога яўкі, кіруючы клас імкнецца прадэманстраваць высокія лічбы ўдзелу людзей у галасаванні. Гэтыя паказнікі з’яўляюцца істотнымі ў прапагандысцкім абгрунтаванні выбарчай легітымнасці. Таксама яны павінны навязаць грамадству адчуванне, што большасць жыхароў краіны падтрымлівае рэжым.

Высокая яўка ў галасаванні на безальтэрнатыўных неканкурэнтных выбарах мусіць стаць сведчаннем падтрымкі дзяржаўнага курсу і легітымізацыі кіруючага класа.

Ахоўнікі рэжыму адаптуюць рэпрэсіўныя і прапагандысцкія захады для перадухілення каляровай рэвалюцыі ў выніку “ашаламляльных” выбараў (база досведу — 2020 год). Арганізатары выбараў робяць электаральны працэс цалкам закрытым і непразрыстым для грамадства. Асноўная задача — не дапусціць у публічную прастору ўцечкі вынікаў галасавання, якія б справакавалі рост незадаволенасці, а пасля і пратэсты супраць фальсіфікацый. Улады забараняюць незалежнае назіранне і альтэрнатыўны падлік галасоў, уводзяць паказальны пераслед выбаршчыкаў: за фотаздымку і вынас бюлетэняў або іншыя нетыповыя электаральныя паводзіны.

Высокая яўка забяспечваецца за кошт пяцідзённага датэрміновага галасавання. Гэта істотна палягчае арганізатарам выбараў выкананне “планавых паказнікаў” — адсачыць рэальную колькасць тых, хто прагаласаваў, наўрад ці магчыма. Каб прадэманстраваць грамадству масавы ўдзел у выбарах, вертыкаль прымушае работнікаў дзяржсектара, студэнтаў і вайскоўцаў галасаваць датэрмінова.

Ахоўнікі рэжыму працягваюць дэматываваць апанентаў да ўдзелу ў выбарчай кампаніі рэпрэсіямі і адсутнасцю апазіцыйных кандыдатаў.

Такім чынам, па ўсёй верагоднасці, кіруючы клас адмовіцца ад канкурэнтнасці на прэзідэнцкіх выбарах 2025 і заблакуе вылучэнне апазіцыйнага (-ых) кандыдата (ў) з перасцярогі мабілізацыі прыхільнікаў перамен. Адным з магчымых сцэнароў можа быць рэгістрацыя невыразнага спарынг-партнера (-ў), што тым не менш можа несці пэўныя пагрозы ў выпадку пратэснага галасавання. Лічбы датэрміновага галасавання працягнуць павялічацца, а ахоўнікі рэжыму захаваюць рэпрэсіі для дэматывацыі апанентаў і пашырэння абсентэісцкіх/байкотных настрояў.

Вы паспяхова падпісаныя

Падпішыцеся на нашу рассылку

Раз на тыдзень у каардынацыі з групай вядучых беларускіх аналітыкаў мы даем аналітычныя каментары да найбольш актуальных і актуальных пытанняў, у тым ліку да закулісных працэсаў, якія адбываюцца ў Беларусі, на беларускай, рускай і англійскай мовах.
EN
BE/RU
Падпісацца

Сітуацыя ў Беларусі

Красавік 8 – Красавік 14
Прагледзець усе

Падпішыцеся на нас

Чытаць больш