Выбары-2025: папулізм Лукашэнкі і прэвентыўныя рэпрэсіі
![Выбары-2025: папулізм Лукашэнкі і прэвентыўныя рэпрэсіі](https://belarusinfocus.pro/wp-content/uploads/2024/08/rezhim.jpg)
Лукашэнка імкнецца падвысіць рэйтынгі даверу напярэдадні прэзідэнцкай кампаніі–2025. Ахоўнікі рэжыму захоўваюць вагу ў рэгуляванні эканомікі і пераразмеркаваннях на спажывецкім рынку. Сілавікі працягваюць дэматываваць грамадства жорсткімі рэпрэсіямі.
Лукашэнка вымушана рэагуе на размовы пра стан здароўя з боку “саюзных” медыя. Расейскія дзяржСМІ маюць істотны ўплыў на аўдыторыю беларускага палітыка. З гэтай прычыны яму даводзіцца абвяргаць чуткі пра пагаршэнне самаадчування падчас саміта Шанхайскай арганізацыі супрацоўніцтва ў Астане. Мэсэджы адрасуюцца чыноўнікам, каб прадухіліць размовы аб патэнцыйнай перадачы ўлады пераемніку. Лукашэнка плануе застацца на пасадзе кіраўніка дзяржавы пасля 2025 года — і ўжо распачаў прэзідэнцкую кампанію.
Дыктатар спрабуе падкарэктаваць асабісты вобраз і падвысіць рэйтынгі падтрымкі. Лукашэнка запознена, але здымае папулісцкія вяршкі з ліквідацыі наступстваў урагану ў Гомельскай вобласці: палітык прыляцеў у Мазырскі раён з інспекцыяй. Дыктатар паспрабаваў накіраваць незадаволенасць насельніцтва ад непаслядоўнай рэакцыі сваёй вертыкалі на чыноўнікаў. Магчыма, Лукашэнка стаў больш уважліва ставіцца да рэакцыі грамадства на рэзанансныя падзеі пасля вяртання ў АП Наталлі Пяткевіч.
У дзяржапараце пагаршаецца якасць кіравання ў выніку разбурэння зваротнай сувязі з насельніцтвам. Як зазначаюць незалежныя сацыёлагі, кіруючы клас аддае перавагу сілавым спосабам вырашэння сацыяльнай напружанасці. Ахоўнікі рэжыму разлічваюць папярэдзіць новыя пратэсты праз маштабныя затрыманні актывістаў вядомых з 2020 года. Прэзідэнцкая кампанія-2025 плануецца ў атмасферы рэпрэсій і запалохвання грамадства.
Паралельна працягваецца ліквідацыя грамадскіх арганізацый — нягледзячы на тое, што яны ўжо перажылі маштабную зачыстку ў 2022-2023 гадах. Суды змагаюцца з іншадумствам: колькасць “экстрэмісцкіх” матэрыялаў і фарміраванняў, а таксама “экстрэмістаў” з ліку апанентаў рэжыму павялічваецца. Сілавікі паказальна пераследуюць маніфестантаў супраць фальсіфікацый і гвалту ў 2020-м. Працягваюцца экспрапрыяцыі маёмасці ў апанентаў рэжыму.
Сілавікі захоўваюць істотны ўплыў у кіруючым класе напярэдадні выбараў-2025. У спецкамісію па адборы кампаній-імпарцёраў алкагольнай прадукцыі акрамя чыноўнікаў увайшлі падаткавікі, сілавікі з КДБ, МУС і Мытнага камітэта . Чыноўнікі заяўляюць аб захаванні брэнда “Востраў чысціні і смаку”, аднак са зменай уласніка. У гэтага буйнога беларускага рытэйла ўзніклі сур’ёзныя фінансавыя праблемы пасля арышту ў 2022 годзе яе ўласнікаў і штрафных экспрапрыяцый у суме USD 7 млн.
Адпаведна сілавікі атрымліваюць фінансавыя бонусы ў выглядзе дадатковых бюджэтных пераразмеркаванняў. Дзяржаўнаму мытнаму камітэту перададуць BYN 2,24 млн з бюджэту.
Такім чынам, кіруючы клас працягвае захоўваюць высокі ўзровень рэпрэсій для дэматывацыі іншадумцаў і прадухілення паслявыбарчых пратэстаў.
Падпішыцеся на нашу рассылку
Сітуацыя ў Беларусі