Рэжым задаволены эканамічнай стабільнасцю, незалежнікі з кіруючага класа пад ціскам актывістаў “рускага міру”

Вышэйшае кіраўніцтва станоўча ацэньвае вынікі адміністрацыйна-сілавога рэгулявання эканомікі на фоне санкцый, што значыць працяг жорсткага цэнавага рэгулявання, штрафаў і экспрапрыяцыі маёмасці ў бізнеса. У кіруючым класе абвастраецца напружанасць у выніку ціску прарасійскіх актывістаў з спробамі вызначаць дзяржаўную палітыку ў моўна-культурнай сферы і ў адносінах да гістарычнай памяці.

Кіруючы клас праводзіць трансфармацыю палітычнай сістэмы па мадэлі “кіруемай дэмакратыі” з афармленнем трох-чатырох палітычных партый.

Сярод сілавікоў і дзяржаўных ідэолагаў-прапагандыстаў даволі распаўсюджаны прарасійскія погляды з падтрымкай радыкальных ідэй “рускага міру”. Актывістка “рускага міру” з Гродна напісала на дэпутата Ігара Марзалюка скаргу ў Генпракуратуру з-за “гнюсных” слоў у абарону беларускай мовы.

З іншага боку, кіруючы клас спрабуе кансалідаваць сваіх прыхільнікаў вакол тэматыкі нацыянальнай бяспекі.

Дабрабыт насельніцтва пагаршаецца, а сярэдні заробак змяншаецца пасля традыцыйнага падвышэння ў снежні 2022 г. Урад вымушаны павялічваць жыллёва-камунальныя тарыфы для насельніцтва.

Паміж Палатай прадстаўнікоў і ўрадам узнікае спрэчка наконт навацый па выплаце пенсіяў, якія пагаршаюць сацыяльнае забеспячэнне для значнай колькасці пенсіянераў (каля 30-35% атрымальнікаў). Аднак Палаце не атрымліваецца стаць фільтрам для рэзанансных рашэнняў, якія могуць выклікаць сур’ёзную незадаволенасць насельніцтва.

Ўлады накіроўваюць дадатковыя сродкі ў бюджэтныя сферы з кадравымі праблемамі, як, напрыклад, для медыкаў, аднак значна менш, чым падчас ковіднага перыяду і выплат. У выніку адток спецыялістаў з аховы здароўя працягваецца.

ВУП скарачацца, што з’яўляецца ў значнай ступені вынікам рэпрэсій і санкцый з-за саўдзелу ў расейскай агрэсіі. Асабістае ўмяшанне Лукашэнкі і сілавікоў у рэгуляванне ІТ-сферы паскорыла заняпад гэтай галіны. Працягваецца рэлакацыя ІТ-бізнеса, а незадаволенасць спецыялістаў заробкамі павялічваецца.

Нацбанк спрабуе стымуляваць эканоміку за кошт больш танных крэдытаў і зніжае стаўку рэфінансавання, што можа прывесці да паскарэння інфляцыі.

 Адміністрацыйна-сілавое рэгуляванне цэнаўтварэння не спыняецца, як і экспрапрыяцыя сродкаў і маёмасці ў прыватнага бізнеса. ДФР завёў крымінальную справу на кіраўнікоў гомельскага аптовага пастаўшчыка гародніны. Брэсцкія падаткавікі налічылі штрафы і дадатковыя сумы падатку сетцы барбершопаў.

У асяроддзі наменклатуры і набліжанага бізнесу адбываецца пераразмеркаванне ўплываў з антыкарупцыйным пераследам з боку сілавікоў. Супраць дырэктара УКБ “Захад” завялі крымінальную справу за карупцыю пры будаўніцтве катэджаў для шматдзетных. Кіраўніцтва “Белэнергасувязі” адправіцца ў калонію за хабар ад пастаўшчыка сістэм відэаназірання.

У выніку перарэгістрацыі ўсе апазіцыйныя і частка лаялісцкіх палітычных партый пазбавяцца афіцыйнага статусу і будуць ліквідаваныя.