План Б: сталінскія выбары

Лукашэнка вызваліў чарговую групу палітзняволеных. Аднак колькасць вязняў, асуджаных па палітычных матывах, папаўняецца за кошт новых затрыманняў.

Ахоўнікі рэжыма праводзяць маштабную кампанію рэпрэсій у дачыненні да іншадумцаў. Сілавікі ўжо каторы год ладзяць канвеерныя зачысткі ў рэгіёнах краіны. Спецпадраздзяленні рэжыма правялі аблавы на актывістаў у Гомельскай вобласці, Століне і ў Глыбокім за пратэсты 2020 г.

Прапагандысты змайстравалі чарговы рэпартаж аб змове з мэтай забіць Лукашэнку і шэраг яго чыноўнікаў. Гістэрыя наконт крыважэрных планаў апанентаў рэжыма мусіць запабегчы расколу сярод кіруючага класа. Такія прапагандысцкія сюжэты кансалідуюць высокіх чыноўнікаў вакол дыктатара. Намерам прапагандыстаў дапамагае манапалізацыя інфармацыйнай прасторы і цяжкасці з доступам беларусаў да незалежных крыніц інфармацыі.

Мінінфарм працягвае татальную зачыстку інфармацыйнай прасторы ад незалежных медыя. Унутры краіны абмежаваны доступ да 5 тыс. інтэрнэт-рэсурсаў, якія размяшчаюць крытычную да рэжыма Лукашэнкі інфармацыю. Сілавікі і ідэолагі ладзяць несупынны пераслед за распаўсюд і спажыванне прадуктаў незалежных медыя.

Лукашэнка працягвае непакоіць працэдура зацвярджэння электаратам чарговага прэзідэнцкага тэрміну і пераадоленне міжнароднай ізаляцыі. Палітык разлічвае правесці кампанію па сілавым сцэнары з закрытасцю працэса ад назіральнікаў і грамадства. Адначасова аўтакрата клапоціць абнаўленне легітымнасці ў вачах міжнароднай супольнасці, а таксама асабістыя перспектывы ў выпадку змены сітуацыі ва Украіне. Хутчэй за ўсё, у кіруючым класе адбываецца дыскусія наконт запрашэння місіі назіральнікаў ад АБСЕ. Карпенка абнадзейвае ўвядзеннем чарговых заканадаўчых навацый пасля правядзення выбараў.

Экс-кіраўнік Цэнтрвыбаркама Ярмошына рэкамендавала правесці выбары ў адпаведнасці з сталінскімі рэкамендацыямі – у сакавіку 2025 г.

Такім чынам, у якасці асноўнага тэрміну правядзення выбараў кіруючы клас разглядае першы квартал 2025 года.