Перадвыбарны расклад: рост заробкаў дзяржсектара, абмежаванні для індывідуальных прадпрымальнікаў, рэпрэсіі апанентаў

Кіруючы клас пераглядае палітыку памяці, ідэалагізуе сістэму адукацыі і сінхранізуе падыходы ў адносінах да беларускай культуры з прапагандай “рускага міру”. Напярэдадні старту выбарчай кампаніі ўлады працягваюць афармленне новай канфігурацыі партыйнай сістэмы і працэс ліквідацыі палітычных партый.

Урад захоўвае эканамічны аптымізм, які падмацоўваецца аднаўленнем фінансавай дынамікі. ВУП вырас на 2,9% за студзень-ліпень 2023 года, а рост рэальных даходаў насельніцтва летам паскорыўся.

Станоўчая дынаміка падмацоўвае ўпэўненасць кіруючага класа ў правільнасці курсу на падтрымку дзяржкампаній і перафарматаванне прыватнага сектара праз скарачэнне індывідуальнага прадпрымальніцтва. Мінск губляе малы бізнес і ІП. За год масавага ад’езду IT-спецыялістаў эканоміка Беларусі страціла больш за BYN 1,0 млрд толькі ў выглядзе заробкаў.

Лукашэнка спрабуе падняць асабісты рэйтынг. Ён крытыкуе падрыхтоўку сістэмы адукацыі да новага навучальнага года і узмацняе кантроль з боку сілавікоў. Плануецца стварыць маніторынгавую групу па тэматыцы падручнікаў пад эгідай Генпракуратуры і Дзяржкантролю. Хутчэй за ўсё, гэта прывядзе да чарговай зачысткі адукацыйных праграм і іх ідэалагізацыі.

Улады прызналі экстрэмісцкімі некаторыя вершы Вінцэнта Дуніна-Марцінкевіча XIX стагоддзя — і паставілі іх у адзін шэраг з творамі асобных беларускіх сучасных аўтараў.

Сілавікі пашыраюць уплыў у сферы адукацыі і ідэалагічнага выхавання. Міністэрства адукацыі і Генпракуратура падрыхтавалі да новага навучальнага года тры выданні на тэму генацыду беларускага народа для школьнікаў усіх узростаў.

У нацыянальным гістарычным архіве праходзяць масавыя затрыманні пасля прызначэння новага дырэктара, былога сілавіка.

“Група Вагнер” плануе заняцца адукацыйнай дзейнасцю ў Беларусі.

З 15 палітычных партый тры прайшлі перарэгістрацыю (таксама была зарэгістравана “Белая Русь”), шэсць патрапілі пад ліквідацыю, а астатнія шэсць знаходзяцца ў працэсе закрыцця. Хутчэй за ўсё, партыйную сістэму сфармуюць чатыры праўладныя партыі, якія фармальна закрыюць увесь ідэалагічны спектр: правыя (ЛДП), цэнтрысты (“Белая Русь”), сацыял-дэмакраты (Рэспубліканская партыя працы і справядлівасці) і левыя (Камуністычная партыя Беларусі). Ліквідацыя астатніх партый (як апазіцыйных, так і праўладных) завяршыцца да выбараў.

Такім чынам, кіруючы клас працягвае расстаноўку выхадцаў з сілавых ведамстваў у дзяржкіраванні і сумежных сферах, што выліваецца ў кадравыя чысткі і ідэалагізацыю.