Лукашэнка ўмацоўвае лаяльнасць заходніх рэгіёнаў, Нацбанк заклапочаны разагрэвам эканомікі

Лукашэнка карэктуе рыторыку ў дачыненні да ўладальнікаў карты паляка, каб умацаваць лаяльнасць чыноўнікаў заходніх рэгіёнаў краіны. Сілавыя і кантрольныя ведамствы павялічваюць унёсак у дзяржаўны бюджэт за кошт штрафаў і экспрапрыяцый у бізнеса.

Лукашэнка ўзяў удзел у туры па заходніх абласцях краіны з інспекцыяй сельскагаспадарчых прадпрыемстваў.

Лукашэнка выказаў намер вярнуцца да праблемы з картай паляка з абяцаннем “не перагнуць палку”. Аднак гэта не гарантуе спыненне жорсткіх захадаў сілавікоў у дачыненні да ўладальнікаў карты.  Таксама не варта чакаць перагляду абмежаванняў дзяржслужбоўцам.

Нацбанк занепакоены магчымымі наступствамі разагравання эканомікі за кошт грашовай эмісіі. Праз павышэнне заробкаў у дзяржсектары Нацбанк спрабуе змякчыць ціск з боку тых, хто лабіруе павелічэнне дзяржвыдаткаў.

Зваротная сувязь дзяржавы з насельніцтвам пагаршаецца. У людзей застаецца ўсё менш механізмаў паўплываць на адчувальныя для іх рашэнні — такія, напрыклад, як змены ў падаткавае заканадаўства.

Чыноўнікі змякчылі нормы заканадаўства, якія пагаршалі ўмовы для прадпрымальніцтва. Аднак рэжым разлічвае істотна скараціць колькасць невялікіх бізнесаў, бо вышэйшае кіраўніцтва разглядае дробных прадпрымальнікаў як пагрозу і адзін з найбольш нелаяльных пластоў грамадства.

Дзяржкантроль правёў на 18% больш праверак і спагнаў на карысць дзяржавы на 21,1% больш сродкаў за першыя шэсць месяцаў гэтага года, чым за той жа перыяд 2022 г.

Чыноўнікі працягваюць папаўняць бюджэт за кошт экспрапрыяцый у прыватнага бізнеса. У Лунінецкім раёне падаткавікі праверылі работу фермерскай гаспадаркі і налічылі дадаткова BYN 240 тыс. падатку для добраахвотнай выплаты ў бюджэт.

У дзяржкампаніях не спыняюцца кадравыя чысткі. На “Нафтане” і “Паліміры” працягваюць звальняць супрацоўнікаў у сувязі з іх падпіскай на тэлеграм-каналы, прызнаныя рэжымам экстрэмісцкімі.

Улады праводзяць паказальную кампанію па дэматывацыі бюджэтнікаў. Гомельскі завод апублікаваў “пакаяннае” відэа супрацоўніка, якога АМАП затрымаў за “экстрэмізм” каля цэха.

Такім чынам, кіруючы клас працягвае ізаляваць работнікаў дзяржсектара ад альтэрнатыўных крыніц інфармацыі.