Лукашэнка аслабляе пазіцыі ўрада Галоўчанкі, выбары пад гарантыямі сілавікоў

Кіраўнік дзяржавы крытыкуе ўрад, што аслабляе рэйтынгі і пазіцыі прэм’ера Галоўчанкі ў кіруючым класе. Беларускае кіраўніцтва разлічвае захаваць маштабныя ўліванні ў дзяржсектар для падтрымання эканамічнага росту, у тым ліку з прыцягненнем расійскіх сродкаў у эканоміку. Кіруючы клас узмацняе ўзаемадзенне паміж арганізатарамі выбараў і сілавікамі для адмежавання выбараў ад магчымага ціску пратэснай аўдыторыі, ізаляцыі ад грамадства і стварэння камфортных умоў для падвядзення вынікаў.

Кіруючы клас непакоіцца наконт правядзення выбарчай кампаніі і апасаецца чарговай пратэснай мабілізацыі грамадства. Старшыня ЦВК Беларусі Карпенка сустрэўся з асабовым складам камандавання ўнутраных войскаў.

Нягледзячы на рост ВУП на 3,5%, кіраўнік дзяржавы звяртаецца да крытыкі ўрада Галоўчанкі для ўраўнаважання палітычнай вагі і рэйтынгаў прэм’ера.

Лукашэнка мае намер пабудаваць другую АЭС у Беларусі, нягледзячы на перыядычныя прастоі існуючай станцыі, зацягванне паўнавартаснага ўвядзення ў эксплуатацыю другога блока дзеючай АЭС, праблем з экспартам электраэнергіі і павелічэннем крэдытнай залежнасці ад Расіі.

Дзяржава працягвае шукаць дадатковыя крыніцы для напаўнення бюджэту і карэктаваць умовы эканамічнай дзейнасці на карысць кароткачасовых фінансавых пераваг.

Кіруючы клас пагаршае ўмовы дзейнасці для замежных кампаній у адказ на санкцыйную палітыку заходніх сталіц. Лукашэнка ўвёў спецыяльны збор для замежных кампаній з несяброўскіх краін.

Урад не дэманструе гатоўнасці прымаць у блізкай і сярэдняй перспектыве захады па аднаўленні інвестыцыйнай прывабнасці краіны і, хутчэй за ўсё, разглядае варыянт доўгага супрацьстаяння з заходнімі сталіцамі з захаваннем з іх боку санкцыйнага падыходу.

Ахоўнікі рэжыму падтрымліваюць рэпрэсіі на высокім узроўні для дэматывацыі прыхільнікаў перамен. Нягледзячы на маштабную зачыстку палітычнага поля і грамадзянскай супольнасці, кіруючы клас не спыняе палітычна матываваны пераслед з-за адсутнасці ўпэўненасці ў пацыфікацыі пратэснага руху. Акрамя крымінальнага пакарання і адміністрацыйных арыштаў, сілавікі займаюцца экспрапрыяцыяй маёмасці і фінансаў апанентаў на карысць дзяржавы.

Дэфіцыт працоўных кадраў працягвае павялічвацца. Аднак кіруючы клас прыярытэзуе чысткі ў дзяржсектары ад іншадумцаў, палітычна матываваны пераслед прыватнага бізнэса.

Урад разлічвае часткова вырашыць кадравую праблему за кошт змяншэння падаткавай нагрузкі на маладых спецыялістаў. Бюджэтныя страты плануюць кампенсаваць за кошт павелічэння падаходнага падатку для высокааплатных супрацоўнікаў.

Уладам не атрымліваецца сфармаваць спрыяльнае грамадскае меркаванне для правядзення пенсійнай рэформы. Гэта звязана з нізкім узроўнем даверу да дзяржаўнай палітыкі ў сферы фінансаў, у тым ліку ў выніку перыядычных дэвальвацый і з-за высокіх інфляцыйных чаканняў. За год да дзяржаўнай сістэмы назапашвання пенсій па схеме «3+3» далучылася 19 тыс. грамадзян.

Такім чынам, кіруючы клас разлічвае паступова павялічыць аб’ёмы пераразмеркавання рэсурсаў ад прыватнага бізнэсу на карысць дзяржкампаній і бюджэтнікаў.