Інфармацыйная вайна-2024: карэкціроўка каардынат

Лукашэнка спрабуе скарэктаваць дзейнасць медыйнай вертыкалі. Яго мэта — пашырыць кола спажыўцоў рэжымнай ідэалогіі. Палітык запатрабаваў ад праўладных журналістаў “змякчыць“ мову прапаганды і антыўкраінскую пазіцыю. Гэта, хутчэй за ўсе, пацягне за сабой кадравыя перастаноўкі ў дзяржаўных медыя.

Лукашэнка сабраў медыйную вертыкаль, ідэолагаў і прапагандыстаў на форуме медыйнай супольнасці Беларусі. Палітык акрэсліў рамкі дзейнасці дзяржаўнай медыявертыкалі і прынцыпы “інфармацыйнай вайны” за год да прэзідэнцкіх выбараў.

Лукашэнка акцэнтаваў увагу на захаванні прапагандысцкай функцыі СМІ з прасоўваннем стратэгічных і бягучых інтарэсаў кіруючага класа.

Палітык акрэсліў рамкі дзейнасці для прапагандыстаў — папулярнасць апошніх не павінна быць вельмі высокай (па асабістых адчуваннях Лукашэнкі). Гэта можа адзначаць пэўнае пераразмеркаванне рэсурсаў ды пасадаў у медыйнай вертыкалі. Хутчэй за ўсё, уплыў аднаго з найбольш адыёзных прапагандыстаў Грыгорыя Азаронка можа скараціцца. У выніку крытыкі верагодна і змякчэнне мовы нянавісці на дзяржаўных медыяканалах.

Кіруючы клас кансалідаваў дзяржапарат, сілавікоў і дзяржсектар. Як вынік, зараз Лукашэнка патрабуе ад прапагандыстаў больш мяккіх метадаў уплыву на аўдыторыю. Хутчэй за ўсё, рэжым разлічвае пашырыць падтрымку дзяржаўных інстытутаў і змякчыць раскол у грамадстве напярэдадні прэзідэнцкіх выбараў-2025.

Варта зазначыць: часта кіруючага класа перыядычна крытыкуе жорсткія падыходы, рыторыку і погляды найбольш адыёзных прапагандыстаў рэжыму.

Лукашэнка таксама запатрабаваў змякчыць акцэнты ў адносінах да Украіны. Хутчэй за ўсё, мэтавая аўдыторыя гэтай рыторыкі — замежныя сталіцы. Дыктатар спрабуе паўплываць на напружаныя адносіны з афіцыйным Кіевам, а ў перспектыве спадзяецца на аднаўленне беларуска-еўрапейскіх кантактаў.

Такім чынам, наўрад ці кіруючы клас пойдзе на паслабленне рэпрэсій у бліжэйшыя месяцы. Аднак, хутчэй за ўсе, прапагандысты скарэктуюць рыторыку ў спробах пашырыць давер з боку “нейтральнай” аўдыторыі.