Выбары ў Каардынацыйную раду: новая ці перагорнутая старонка?

Выбары новага складу Каардынацыйнай рады (КР) — тэст мабілізацыйных магчымасцяў дэмакратычных сіл на фоне жорсткай аўтарытарнай рэакцыі і супрацьдзеяння з боку рэжыму Лукашэнкі. У выніку выбараў дэмсілы атрымліваюць новыя электаральныя механізмы абнаўлення легітымнасці сваіх платформ і паляпшаюць зваротную сувязь з прыхільнікамі.

Арганізатары і распрацоўшчыкі праграмнага забеспячэння сутыкаюцца з крытыкай актывістаў і апанентаў Святланы Ціханоўскай у дадатак да спробаў спецслужбаў Лукашэнкі сарваць галасаванне на выбарах у новы склад КР.

Працэдурныя цяжкасці абмяжоўваюць аўдыторыю галасавання. Патэнцыйнаму выбаршчыку неабходна мець афіцыйны пашпарт Беларусі. У сваю чаргу актыўная частка патэнцыйных удзельнікаў галасавання знаходзяцца ў вымушанай эміграцыі, а частка з іх не мае пашпарту.

Дэмакратычная лідарка Беларусі Ціханоўская трымае дыстанцыю ад выбарчага працэсу — гэтая пазіцыя непакоіць частку арганізатараў і ўдзельнікаў выбараў. Шэраг прадстаўнікоў выбарчых спісаў у КР апублікавалі сумесны зварот да Ціханоўскай, цэнтраў дэмакратычных сіл і незалежных СМІ надаць максімальную ўвагу электаральнай кампаніі.

Для прыцягнення ўвагі да выбараў у КР дэмсілы праводзяць вялікую палітычную канферэнцыю з дыскусіяй па трох кірунках дзейнасці: варыянт трансфармацыі рэжыму (сілавы ці мірны сцэнары), вызваленне палітзняволеных і прыцягненне ўвагі міжнароднай супольнасці да Беларусі.

У сваю чаргу падчас выбараў у КР палітарганізацыі актывізавалі камунікацыю з уладамі краін ЕС па адстойванні інтарэсаў беларускіх эмігрантаў і спрыянню мабільнасці для ўсіх беларусаў. Прыкладам такой камунікацыі сталі сустрэчы з польскімі чыноўнікамі або акцыі ў польскай сталіцы.

Дэмсілы і незалежныя медыя актывізуюць узаемадзеянне з еўраінстытуцыямі для прасоўвання парадку дня грамадзянскай супольнасці. Прэзідэнтка еўрапарламента Раберта Метсола ў інтэрв’ю незалежнаму выданню “Зеркало” пацвердзіла курс на падтрымку грамадзянскай супольнасці і развіццё кааперацыі з дэмсіламі, а таксама ўзмацненне санкцый у дачыненні да рэжыму Лукашэнкі.

Дэмсілы працягваюць паспяховую камунікацыю з афіцыйным Вашынгтонам. У Палату прадстаўнікоў ЗША ўнеслі новы Акт аб дэмакратыі ў Беларусі.

Такім чынам, дэмсілы імкнуцца захаваць устойлівую камунікацыю з прыхільнікамі і абнавіць легітымнасць супольных платформ з прыцягненнем ІТ-спецыялістаў.