Выбарчы парадак дня дэмакратычных сіл: ухіліцца ад рэпрэсій

Дэмакратычныя сілы дамагаюцца поспехаў у прасоўванні парадку дня пры камунікацыі з Захадам. Пры гэтым прэзідэнцкая кампанія ў Беларусі знаходзіцца на перыферыі ўвагі кааліцыі Святланы Ціханоўскай. Гэта тлумачыцца тым, што палітарганізацыі клапоцяцца пра бяспеку прыхільнікаў перамен і захаванне актывістаў у Беларусі на фоне ўзмацнення рэпрэсій. 

Дэмсілы наладжваюць эфектыўную камунікацыю з Еўрапарламентам — і, як следства, кааліцыя Святланы Ціханоўскай працягвае кампанію па ізаляцыі і дэлегітымізацыі Лукашэнкі. У прыватнасці, гэта прадугледжвае непрызнанні вынікаў рэжымных выбараў-2025 на міжнародным узроўні. У сваю чаргу Еўрапарламент ужо прызнае выбары несправядлівымі, бо яны ладзяцца ў атмасферы страху і рэпрэсій.

Асобныя палітыкі спрабуюць падвысіць рэйтынгі і ўвагу да тэмы выбараў. Палітык і чалец НАУ Юрый Губарэвіч даслаў з-за мяжы ў ЦВК дакументы для ўдзелу ў кампаніі, аднак яго ініцыятыўная група не была зарэгістравана.

За выключэннем асобных апазіцыянераў, дэмакратычныя сілы адмаўляюцца ад мабілізацыі прыхільнікаў. Гэта звязана з клопатам пра бяспеку актывістаў. Ахоўнікі рэжыму істотна ўзмацняюць рэпрэсіі і зачысткі ў рэгіенах пасля аб’яўлення даты выбараў.

Дэмсілы канцэнтруюць увагу на міжнароднай актыўнасці. Яны працягваюць адстойваць інтарэсаў сімпатызантаў у камунікацыі з Захадам. Кааліцыя Ціханоўскай прыцягвае істотную фінансавую дапамогу для беларусаў, якія зазналі пераслед. Так, Данія выдаткуе EUR 700 тыс. на падтрымку рэпрэсаваных у Беларусі і іх сем’яў. Усяго ж міжнародны гуманітарны фонд ужо сабраў болей EUR 2 млн за 2024 г.

Дэмсілы ўзмацняюць пазіцыі ў кааперацыі са скандынаўскімі краінамі. Краіны Паўночнай рады прызначаць каардынатараў па кантактах з дэмсіламі Беларусі.

У Польшчы Кабінет Ціханоўскай абараняе інтарэсы палітэміграцыі на фоне ўзмацнення жорсткасці міграцыйнай палітыкі. Гэта падвышае рэйтынгі як дэмсіл, так і асобных палітыкаў. Намеснік кіраўніцы АПК Латушка сустрэўся з кіраўніком Упраўлення па справах замежнікаў Польшчы Цытрыновічам.

Шматмесячная рэзанансная кампанія ў падтрымку рэжысера Андрэя Гнёта прынесла плен. Беларус пакінуў Сербію і знаходзіцца ў бяспецы. Рэжысеру пагражала экстрадыцыя ў Беларусь. Офіс Ціханоўскай веў перамовы аб вызваленні Гнета з прэзідэнтам Сербіі Вучычам.

Дэмсілы дэманструюць прыхільнікам станоўчыя эфекты стратэгічнага дыялогу з Вашынгтонам. У ЗША з’явілася ініцыятыва па прызнанні пратэрмінаваных беларускіх пашпартоў.

Такім чынам, дэмсілы адмаўляюцца ад мабілізацыйных захадаў падчас электаральнай кампаніі і надаюць прыярытэтную ўвагу бяспецы сімпатызантаў у Беларусі.