Сілавікі руйнуюць рэпутацыю ByPol, дэмакратычныя арганізацыі кансалідуюць актывістаў у эміграцыі

Дэмсілы атрымліваюць рэпутацыйныя страты ў выніку медыйнага рэзанансу ад унутранага канфлікту паміж супрацоўнікамі арганізацыі сілавікоў з BYPOL. Кабінет Святланы Ціханоўскай працягвае напрацоўваць давер з беларускімі добраахвотнікамі і кіраўніцтвам Украіны. 

Аб’яднаны пераходны кабінет спрабуе зменшыць напружанасць і медыйны рэзананс вакол ByPol, які цесна афіліяваны з АПК. Аднак у канфлікт уцягваюцца добраахвотнікі з Украіны.

Давер да ініцыятыў дэмсіл і грамадзянскай супольнасці пагаршаецца з-за асцярогі пагрозы асабістай бяспецы прыхільнікаў перамен у выніку скандалаў вакол ByPol і плана “Перамога”.

Пазіцыі Кабінета Ціханоўскай ва ўзаемадачыненнях з кіраўніцтвам Украіны ўзмацняюцца. Кіраўнік Дэпартаменту нацыянальнай бяспекі ў складзе АПК Валерый Сахашчык заявіў аб стварэнні ў складзе Ўзброеных сіл Украіны беларускай дэсантна-штурмавой роты.

Ціханоўская паляпшае ўзровень даверу з добраахвотнікамі ва Украіне. Лідар дэмакратычнай Беларусі правяла азнаямляльную відэаразмову з ваярамі з палка Каліноўскага з перспектывай наладзіць супрацоўніцтва.

Кіберпартызаны працягваюць нагадваць пра сябе ўзломамі анлайн-рэсурсаў у Беларусі. Яны ўзламалі сайт спартовай газеты «Прессбол».

Дэмсілы працягваюць кампанію па ініцыяванні міжнароднага пераследу рэжыму Лукашэнкі.

Ціханоўская ў Вене сустрэлася з прэзідэнтам Аўстрыі Аляксандрам ван дэр Беленам. Кіраўніца аўстрыйскага МЗС Аляксандра Шаленберг прапануе перадаць у Міжнародны крымінальны суд доказы датычнасці рэжыму Лукашэнкі да вывазу ўкраінскіх дзяцей з акупаваных тэрыторый.

Прадстаўнікі дыяспары і АПК сустрэліся з абраным прэзідэнтам Латвіі Эдгарсам Рынкевічсам і абмеркавалі супрацоўніцтва з дэмакратычнымі сіламі Беларусі.

Офіс Ціханоўскай, АПК і Каардынацыйная Рада у супрацоўніцтве з грамадскімі арганізацыямі спрабуюць рэкрутаваць і кансалідаваць актывістаў у вымушанай эміграцыі ў Польшчы.

Такім чынам, узаемныя абвінавачанні і напружанасць у дэмсілах павялічваюцца ў сітуацыі працяглага супрацьстаяння з рэжымам Лукашэнкі без відавочных змен унутры краіны.