Каліброўка пазіцый: санкцыі рэжыму і мабільнасць для беларусаў

Прыхільнікі санкцыйнага падыходу карэктуюць акцэнты ў камунікацыі з Захадам — палітыкі вымушаны факусаваць увагу на захаванні мабільнасці для беларусаў. Гэта тлумачыцца незадаволенасцю людзей ростам абмежаванняў. Таксама негатыў звязаны з правалам камунікацыі дэмакратычных сіл: палітыка санкцый дрэнна тлумачыцца шырокім групам грамадства.

Лідар Народнага Антыкрызіснага Упраўлення (НАУ) і намеснік кіраўніцы Аб’яднага пераходнага кабінета (АПК) Павел Латушка абмеркаваў у польскім МЗС пашырэнне колькасці віз для беларусаў, функцыянаванне памежных пераходаў для выезду грамадзян РБ у ЕС і закрыцце гандлевых пераходаў для рэжыму Лукашэнкі.

Санкцыйныя падыходы застаюцца папулярнымі сярод актывістаў дэмакратычнага руху. Аднак насельніцтва, у тым ліку частка прыхільнікаў перамен, адмоўна ставяцца да абмежаванняў. Часам санкцыі ўскладняюць жыцце асобным групам грамадства, якія наўрад ці з’яўляюцца сімпатызантамі рэжыму.

Дэмсілы і незалежныя медыя не сфармавалі сярод прыхільнікаў кансэнсусу ў адносінах да санкцый. Грамадства не разумее двухбаковую пазіцыю дэмсіл: санкцыі для рэжыму і падтрымка грамадзянскай супольнасці. Гэтым карыстаецца прапаганда для дыскрэдытацыі палітарганізацый.

У дадатак уплыў незалежных медыя на парадак дня скарачаецца. Гэта звязана як з рэпрэсіямі з боку рэжыму ды дэпалітызацыяй грамадства, так і са значна меншымі рэсурсамі ў параўнанні з дзяржаўнымі СМІ. Асобныя беларускія рэдакцыі знаходзяцца пад пагрозай закрыцця або скарачэння дзейнасці, як, напрыклад, Белсат.

Дэмсілы разлічваюць на камунікацыю кіраўніцтва ААН з Лукашэнкам ў справе вызвалення палітзняволеных. Гэта не азначае змену падыходаў сярод прыхільнікаў ізаляцыі рэжыму. Аднак частка актывістаў праваабарончых арганізацый лічыць неабходным весці перамовы з кіруючым класам — у тым ліку з прыцягненнем шырокага кола аўтарытэтных пасярэднікаў.

Такім чынам, дэмсілы рызыкуюць паступова страціць уплыў на фармаванне палітыкі Захаду ў дачыненні да рэжыму Лукашэнкі.