Кабінет Ціханоўскай узмацняе міжнародны ціск на рэжым, дэмсілы гуртуюцца вакол ідэі еўраінтэграцыі

Дэмсілы працягваюць кансалідацыю праеўрапейскі настроенай часткі грамадства, умацоўваюць палітычныя сувязі з Захадам і акрэсліваюць намеры еўраінтэграцыі краіны. Палітарганізацыі паспяхова прасоўваюць парадак дня дэмакратычнага руху ў камунікацыі з замежнымі партнёрамі: ізаляцыя і пераслед рэжыму Лукашэнкі, а таксама падтрымка еўрапейскіх перспектыў для Беларусі пасля дэмакратычнага транзіту.

Палітарганізацыі на розных узроўнях камунікуюць з заходнімі партнёрамі і актуалізуюць тэму Беларусі.

Лідар дэмакратычнай Беларусі Святлана Ціханоўская выступіла з прамовай у Еўрапейскім парламенце: заклікала падтрымаць дэмакратычную Беларусь і папрасіла дапамогі, каб прыцягнуць Лукашэнку да адказнасці. Прадстаўнікі КР таксама выступілі перад еўрапарламентарамі, сцвердзіўшы праеўрапейскія памкненні беларусаў. Еўрапарламент прыняў рэзалюцыю “Аб адносінах з Беларуссю” з асуджэннем рэжыму за рэпрэсіі і прыгнёт людзей. Таксама палітыкі заклікалі Міжнародны крымінальны суд разглядзець магчымасць выдаць ордэр на арышт Лукашэнкі за злачынствы супраць чалавецтва.

Ціханоўская плануе тыднёвы візіт у ЗША з сустрэчамі на высокім узроўні і з дыяспарай. Лідарка дэмсіл атрымае прэмію НАТА за ўнёсак у дасягненне міру.

Дэмсілы пашыраюць павестку ў камунікацыі з заходнімі ўрадамі адносна ізаляцыі рэжыму і падтрымкі дэмсіл у вайскова-палітычным супрацоўніцтве. Ціханоўская сустрэлася з прэм’ерам Швецыі Ульфам Крыстэрсанам і шведскім міністрам абароны Полам Ёнсанам.

АПК умацоўвае кадравы патэнцыял. Да каманды прадстаўніка па транзіце ўлады Аб’яднанага пераходнага кабінета Латушкі далучыўся экс-намеснік кіраўніка праўлення “БНБ-Банка” і экс-гендырэктар футбольнага клуба БАТЭ Залеўскі.

Крытыкі Ціханоўскай актывізуюць спробы перацягнуць медыйную ўвагу і ў чарговы раз пераразмеркаваць уплыў у дэмакратычным руху. Пасля няўдалых спроб перахапіць лідарства ў кааліцыі Ціханоўскай Цапкала падаў у суд на Еўрапейскую камісію “за падрыў адзінства дэмакратычнага руху ў Беларусі”.

Дыяспары працягваюць налаштоўваць мерапрыемствы для кансалідацыі грамадскіх актывістаў у вымушанай эміграцыі. У Варшаве прайшоў Першы Кангрэс беларускай культуры ў эміграцыі.

Такім чынам, у адказ на згортванне Лукашэнкам функцый дзяржавы ў дачыненні да апанентаў і эміграцыі, дэмсілы будуюць інфраструктуру альтэрнатыўных інстытутаў з пашырэннем сэрвісаў для беларусаў у замежжы, у тым ліку з узмацненнем вайсковага складніка.