Дыпламатычныя дасягненні дэмсілаў і правал у камунікацыі з беларусамі

Пры параўнанні ўзроўню і частаты замежнапалітычных кантактаў Святланы Ціханоўскай і Аляксандра Лукашэнкі відавочная перавага дэмакратычнай лідаркі. Аднак дэмсілы прайграюць у данясенні сваіх міжнародных дасягненняў да беларускай аўдыторыі. Адначасова ў Каардынацыйнай Радзе павялічваецца напружанасць – інтарэсы апазіцыйнай меншасці ігнаруюцца.

Прапагандысты рэжыму вымушаны весці актыўную працу, каб нівеляваць дасягненні дэмакратычных сіл на міжнароднай арэне. Аднак дэмсілы пакуль не здольныя сфармаваць спрыяльную для сябе і сваіх пазіцый грамадскую думку ўнутры краіны. Гэта звязана са скарачэннем уплыву палітарганізацый на інфармацыйны парадак дня — у тым ліку праз змяншэнне аўдыторыі незалежных медыя.

Дэмсілы прасоўваюць парадак дня беларускай грамадзянскай супольнасці ў замежжы. Асноўныя тэзісы ўключаюць ізаляцыю рэжыму Лукашэнкі і падтрымку грамадзянскай супольнасці. Да саміту NATO у The Washington Post выйшаў сумесны артыкул лідаркі дэмакратычнай Беларусі Святланы Ціханоўскай і экс-спікеркі Палаты прадстаўнікоў ЗША Нэнсі Пэлосі, а затым і сумесны эфір у амерыканскім ранкавым шоу “Morning Joe” на тэлеканале MSNBC.

Дэмсілы развіваюць дыпламатычныя поспехі. АБСЕ перазапускае Венскі механізм у дачыненні да Беларусі — з ініцыятывай выступіла група “Сябры дэмакратычнай Беларусі”. Ціханоўская прыняла ўдзел у саміце NATO, дзе ўзяла ўдзел у сустрэчах высокага палітычнага ўзроўню.

Нягледзячы на істотныя дыпламатычныя поспехі каманды Ціханоўскай, уплыў дэмсіл на выпрацоўку палітыкі Захаду ў дачыненні да Беларусі звужаецца. Абмежаванні пашыраюцца на шараговых беларусаў, а беларусаў пачынаюць раўняць з расіянамі. Ціханоўская заклікала Польшчу змякчыць умовы правозу пакупак для беларусаў.

Кааліцыя Латушкі працягвае ўмацоўваць пазіцыі ў Каардынацыйнай Радзе са стратай уплыву на прыняцце рашэнняў апазіцыйнымі спісамі. Прадстаўніца спісу “Каманда Латушкі” і Рух “За Свабоду” Мельнікава абраная спікерам КР, віцэ-спікерам стала прадстаўніца спісу “Еўрапейскі выбар” Гліннік. Фактычна гэтыя два спісы блізкія да Кабінету і Офісу Ціханоўскай. Правілы гульні ўсе часцей пераглядацца і вызначаюцца без уліку меркавання апазіцыйнай меншасці. Гэта паскарае прыняцце рашэнняў, аднак вядзе да росту напружанасці і ўзаемнай крытыкі, а таксама можа прыводзіць да чарговых скандалаў.

Такім чынам, у выпадку ігнаравання інтарэсаў апазіцыйнай меншасці Раду можа чакаць чарговы крызіс з выхадам чальцоў-апазіцыянераў з яе складу.