Дыпламатычны патэнцыял дэмакратычных сіл у дэпалітызаваным грамадстве

Справа рэжысера Андрэя Гнета і арышт палітэмігрантаў пасля высылкі са Швецыі падсвяцілі запатрабаванасць грамадствам супольных інстытуцый дэмакратычных сіл. Адпаведна для Офіса Святланы Ціханоўскай, Аб’яднанага Пераходнага Кабінета і Каардынацыйнай Рады адвакатаванне інтарэсаў беларускай эміграцыі ў камунікацыі з Захадам ператвараецца ў прыярытэтную задачу. Часцей за ўсе яе паспяховае вырашэнне тычыцца менавіта рэзанансных выпадкаў.

Вага дэмакратычных сіл у камунікацыі з Захадам залежыць ад мабілізацыйных магчымасцяў беларускай грамадзянскай супольнасці. Варта зазначыць: пасля 2020 увага замежных партнераў да Беларусі паменшылася на фоне дэпалітызацыі практычна ўсіх груп насельніцтва людзей.

Найбольш яскравы прыклад апускання грамадства ў “палітычную спячку” — травеньскія выбары ў Каардынацыйную Раду ІІІ склікання. Да электаральнай кампаніі далучыліся толькі каля 7,0 тыс. чалавек. Адначасова ў дэмсілах адбываецца адток актывістаў, што павялічвае кадравы дэфіцыт. Гэта, безумоўна, уплывае на патэнцыял дэмсіл у адстойванні інтарэсаў грамадзян.

Беларускія палітэмігранты ў Швецыі працяглы час не маглі паўплываць на змену стаўлення мясцовых чыноўнікаў у прадстаўленні ўцякацтва. Тым не менш практыка прадстаўлення абароны беларусам у Швецыі зменіцца. На гэта паўплываў грамадскі рэзананс кейса з затрыманнем па палітычных матывах беларуса пасля яго высылкі са Швецыі. Ціск на тамтэйшы ўрад адбываўся на розных узроўнях праз незалежныя медыя і праваабарончыя арганізацыі, а таксама інстытуцыі дэмсіл. У выніку шведскае міграцыйнае ведамства заявіла намер пераглядзець справы аб палітычнага прытулку для грамадзян РБ.

У сваю чаргу Беларуская незалежная кінаакадэмія арганізавала рэзанансную кампанію ў падтрымку рэжысера Андрэя Гнета. Пад адкрытым лістом у яго падтрымку падпісаліся каля 500 дзеячаў культуры з усяго свету. Amnesty International прыняла заяву да Сербіі аб неадкладным спыненні працэсу экстрадыцыі рэжысера.

Такім чынам, справа Гнета і кейс з арыштам беларусаў пасля высылкі са Швецыі паўплываюць на кансалідацыю палітэміграцыі — у тым ліку ўзмацненне пазіцый супольных інстытуцый дэмсіл.