Дэмсілы працягваюць ізаляваць рэжым, крытыка Кабінету Ціханоўскай узмацняецца

Праваабаронцы падтрымліваюць увагу міжнароднай супольнасці да рэпрэсій у Беларусі, а дэмакратычныя сілы прасоўваюць павестку дэлегітымізацыі рэжыму Лукашэнкі і яго сілавікоў на міжнародным узроўні. Добраахвотнікі ва Украіне і кіберпартызаны спрабуюць выбудаваць новую кааліцыю з мэтай пераразмеркаваць уплыў на фоне ўзмацнення крытыкі ў адносінах да дэмакратычных сілаў на чале з Ціханоўскай.

У Осла на цырымоніі ўручэння Нобелеўскай прэміі міру заснавальніку праваабарончага цэнтру “Вясна” Алесю Бяляцкаму прысутнічала лідарка дэмакратычнай Беларусі Святлана Ціханоўская (афіцыйны амбасадар рэжыму Лукашэнкі не быў запрошаны на мерапрыемства).

Святлана Ціханоўская сустрэлася ў Стакгольме з кіраўнікамі дыпламатычных місіяў заходніх краін, а таксама з шведскімі ўладамі з павесткай дэлегітымізацыі рэжыму Лукашэнкі і павелічэння падтрымкі грамадзянскай супольнасці.

Высілкі дэмсілаў па міжнародным пераследзе ахоўнікаў рэжыму за злачынствы ў адносінах да апанентаў і дэлегітымізацыі рэжыму Лукашэнкі прыносяць плён. У Сейме Літвы заклікалі прызнаць КДБ і ГУБАЗіК тэрарыстычнымі арганізацыямі, а таксама прыпыніць удзел Беларусі ў міжнародных арганізацыях, у тым ліку ЮНЕСКА. Услед за літоўцамі кіраўніцтва Чэхіі абмяркуе ўжыванне інструментаў універсальнай юрысдыкцыі ў крымінальных справах супраць беларускіх сілавікоў. У выніку ахоўнікі рэжыму Лукашэнкі вымушаны адмаўляцца ад практыкі запалохвання іншадумцаў з апублічваннем пакаяльных відэа.

Грамадзянская супольнасць і дэмакратычныя сілы на чале з Святланай Ціханоўскай ўзмацняюць камунікацыю з польскімі ўладамі і супрацьдзейнічаюць адмоўным эфектам у адносінах да беларусаў-эмігрантаў з-за падтрымкі рэжымам Лукашэнкі крамлёўскай агрэсіі ва Украіне. Прэзідэнт Польшчы ў Варшаве сустрэўся з беларусамі.

Крытыка ў адносінах да Кабінета Ціханоўскай павялічваецца, што звязана з стомленасцю грамадства ад доўгага супрацьстаяння з рэжымам Лукашэнкі пры адсутнасці відавочных поспехаў дэмакратычнага руху ўнутры краіны ў сітуацыі працяглых рэпрэсій і зачысткі ад іншадумства, а таксама разгортвання палітыкі саветызацыі і русіфікацыі грамадства.

Добраахвотнікі ва Украіне працягваюць спробы ўзмацніць пазіцыі і пераразмеркаваць уплыў у дэмакратычным руху. “Полк Каліноўскага” і “Кіберпартызаны” заявілі аб аб’яднанні.

Ініцыятары праекту “Новая Беларусь” працягваюць выбудоўваць анлайн-інфраструктуру для ўзмацнення грамадзянскай супольнасці, а таксама кампенсацыі рэпрэсаваным беларусам функцый і паслуг, якіх іх пазбаяўляе дзяржава на чале з Лукашэнкам. Па ўсёй верагоднасці, праект працягне набываць папулярнасць.

Па ўсёй верагоднасці, у бліжэйшы час у дэмакратычным руху ўзрасце напружанасць і ўзаемная крытыка.