Дэмсілы кансалідуюць дыяспару, палітарганізацыі ігнаруюць унутрыбеларускую павестку

Дэмакратычныя сілы працягваюць аддаляцца ад унутрыбеларускай сацыяльна–эканамічнай і палітычнай павестак. Замест гэтага яны факусуюцца на стварэнні ў эміграцыі протадзяржаўных інстытутаў. Палітарганізацыі канцэнтруюцца на кансалідацыі дыяспары і абароне інтарэсаў суайчыннікаў у замежжы — у тым ліку кампенсацыі палітэмігрантам тых функцый і правоў, якіх іх пазбаўляе рэжым.  

 Дэмсілы працягваюць актуалізаваць тэму легалізацыі беларусаў за мяжой у выпадку вымушанай эміграцыі з-за пераследу. Святлана Ціханоўская распавяла пра рэалізацыю праекта па выпуску і прызнанні пашпарта Новай Беларусі. У сваю чаргу прадстаўнік АПК Кавалеўскі пацвердзіў перанос тэрмінаў выдачы дакумента.

Палітарганізацыі канцэнтруюць увагу на абранні новага складу Каардынацыйнай рады. Фокус на ўнутрыарганізацыйнай павестцы абмяжоўвае аўдыторыю дэмакратычнага руху. Пры гэтым КР імкнецца кансалідаваць дыяспару і далучыць да дыялогу палітычных актывістаў у эміграцыі. Спікер КР Андрэй Ягораў, прадстаўнік АПК па пытаннях абароны і нацбяспекі Валер Сахашчык і папулярны экс-рэстаратар Вадзім Пракоп’еў праводзяць сумесныя сустрэчы з беларускай дыяспарай за мяжой.

Аднак сумнеўна, што дэмсілы зацікавяць шырокую аўдыторыю выбарамі ў Каардынацыйную раду. Праблема ў тым, што функцыі КР і яе ўплыў на медыяпавестку значна саступаюць іншым супольным або персанальным палітычным праектам.

Дэмакратычнае ядро падтрымлівае ўвагу кіраўніцтва еўрапейскіх краін да рэпрэсій у дачыненні да незалежных журналістаў. Еўрапейскія дыпламаты адправілі ліст беларускім медыйшчыкам-палітвязням.

Дэмсілы кансалідуюць палітэміграцыю і прасоўваюць інтарэсы дыяспары. У Літве працягваюцца грамадская кампанія і кансультацыі з літоўскімі палітыкамі і дзяржаўнымі органамі наконт павелічэння тэрмінаў гуманітарных відаў на жыхарства для беларусаў з аднаго да трох гадоў.

Пачатак выбарчай кампаніі рэжыму ў парламент і мясцовыя саветы знаходзіцца далёка па-за мэйнстрымам медыйнага парадку дня і дзейнасці дэмсіл.

Такім чынам, палітарганізацыі адыходзяць ад уплыву на медыйны парадак дня і зваротную сувязь з аўдыторыяй унутры Беларусі.