Дэмсілы канцэнтруюцца на антыядравай кампаніі, Латушка кансалідуе прыхільнікаў сілавой змены рэжыму

Грамадзянская супольнасць, дэмсілы і незалежныя медыя канцэнтруюцца на антыядравай павестцы і тэматыцы паступовай страты незалежнасці Беларусі. Намеснік кіраўніцы АПК Павал Латушка спрабуе кансалідаваць прыхільнікаў сілавой змены рэжыму Лукашэнкі на фоне падзення даверу да сілавікоў з ByPol.

 Антыядравая кампанія дэмсіл рэзануе з настроямі насельніцтва ў супрацьвагу рэжыму Лукашэнкі, які з дапамогай прапаганды спрабуе падсвяціць перавагі ядравага статусу і змяніць грамадскае меркаванне. Аднак акрамя міжнароднага і медыйнага ціску ў дэмсіл абмежаваны інструменты ўплыву на рашэнні кіруючага класа. Петыцыя супраць размяшчэння ядравай зброі на тэрыторыі Беларусі мае нязначную колькасць падпісантаў, што можа быць звязана з высокім узроўнем рэпрэсій. 

Святлана Ціханоўская заклікала разгледзець пытанне размяшчэння ядравай зброі ў Беларусі ў рамках Генеральнай асамблеі ААН і Рады бяспекі ААН.

Намеснік старшыні АПК і кіраўнік НАУ Павел Латушка зрабіў жорсткую заяву адносна размяшчэння ў Беларусі ядравай зброі і заклікаў любымі даступнымі сродкамі забяспечыць ліквідацыю рэжыму Лукашэнку.

Незалежны прафсаюзны рух дабіваецца поспеху на міжнародным узроўні ў павелічэнні ціску на рэжым Лукашэнкі, нягледзячы на мабілізацыю кіруючым класам рэсурсаў і міжнародных кантактаў. Міжнародная арганізацыя працы прыняла рэзалюцыю пра заставанне ў дачыненні да Беларусі артыкула № 33 статута арганізацыі.

Грамадзянская супольнасць і дэмакратычныя сілы імкнуцца кансалідаваць і адстойваць інтарэсы беларускіх бізнесоўцаў у эміграцыі ў рамках Асацыяцыі беларускага бізнесу за мяжой (ABBA).

Дэмсілы напрацоўваюць давер у адносінах з беларускімі добраахвотнікамі ва Украіне і мабілізуюць дапамогу для ваяроў. Офіс Ціханоўскай пры дапамозе МЗС Германіі перадаў пікапы ў полк Каліноўскага. Лідар дэмакратычнай Беларусі ўручыла медалі «Гонар і годнасць» блізкім загінуўшых добраахвотнікаў.

Дэмсілы працягваюць развіваць камунікацыю з украінскім кіраўніцтвам. Намеснік кіраўніцы АПК Валер Кавалеўскі сустрэўся з дарадцам Офісу прэзідэнта Украіны Міхаілам Падалякам з прасоўваннем павесткі дэмсіл наконт легітымнасці Ціханоўскай і падтрымкі з боку Украіны дэмакратычнай Беларусі, а таксама супрацы на міжнародным узроўні.

Дэмсілы працягваюць захады па дэлегітымізацыі і міжнародным пераследзе рэжыму Лукашэнкі. Прадстаўнік АПК і кіраўнік НАУ Павал Латушка абвесціў аб перадачы матэрыялаў Міжнароднаму крымінальнаму суду аб незаконным вывазе дзяцей з Украіны і падрыхтоўцы справаздачы аб адказнасці Лукашэнкі за злачынствы супраць чалавечнасці.

Дэмсілам атрымліваецца змякчыць наступствы ўнутранага канфлікту ў арганізацыі сілавікоў ByPol у выніку медыяцыі Святланы Ціханоўскай і АПК.

Такім чынам, дэмсілам наўрад ці атрымаецца мабілізаваць грамадства супраць размяшчэння ядравай зброі з-за высокага ўзроўню рэпрэсій у краіне.