Дэмакратычныя сілы змагаюцца з наступствамі выбарчых рэпрэсій

Электаральная тэматыка не з’яўляецца прыярытэтам для дэмакратычных сіл і незалежных медыя. Асноўная палітыка апанентаў рэжыму арыентуецца на адвакатаванне інтарэсаў сімпатызантаў і падтрымку рэпрэсаваных. Таксама важныя акцэнты робяцца на ізаляцыю Лукашэнкі і непрызнанне вынікаў выбараў. Гэта звязана з істотным звужэннем прасторы для легальнай актыўнасці і выбарчай мабілізацыі сімпатызантаў апазіцыі на фоне ўзмацнення рэпрэсій. 

Праваабаронцы з “Вясны” і БХК арганізоўваюць назіранне за прэзідэнцкай кампаніяй у Беларусі. Гэта дазваляе фіксаваць маштабныя парушэнні палітычных і грамадзянскіх правоў насельніцтва з боку рэжыму Лукашэнкі.

Дэмакратычныя сілы і грамадзянская супольнасць надаюць пераважнае значэнне дапамозе пацярпелым ад рэпрэсій. BYSOL працуе ў экстранным рэжыме ў сувязі з павелічэннем заявак на эвакуацыю з Беларусі. Фонд мае сетку з 89 прытулкаў за мяжою і дадаткова плануе адкрыць яшчэ тры – у Польшчы, Літве, Грузіі.

Дэмсілы працягваюць замацоўваць дыпламатычныя поспехі ў камунікацыі з Захадам. Аўстрыя следам за Швецыяй выдала беларусам першыя пашпарты замежніка. Гэта — вынік паспяховай кампаніі дэмсіл па адстойванні інтарэсаў палітэмігрантаў перад еўрапейскімі ўрадамі.

У Вільні з’явіцца інфармацыйны пункт Рады Еўропы для беларусаў. У 2022 годзе дзякуючы намаганням кааліцыі Ціханоўскай з’явілася Кантактная група Рады Еўропы па супрацоўніцтве з прадстаўнікамі беларускіх дэмсіл і грамадзянскай супольнасці.

Дэмсілы спрабуюць усталяваць устойлівую камунікацыю з украінскім грамадствам. У Кіеве прайшоў ІІІ беларуска-ўкраінскі Форум Астрожскіх з удзелам прадстаўнікоў Кабінета Ціханоўскай і Каардынацыйнай рады, а таксама ўкраінскіх палітыкаў. Дэлегацыя дэмсіл падчас візіту ва Украіну правяла сустрэчу ў Міністэрстве замежных спраў.

У сваю чаргу раней адзін з найбольш папулярных праектаў дэмсіл – “Пашпарт Новай Беларусі” – паступова адышоў у нябыт. Гэта можа быць звязана і з нарастаннем дэфіцыту рэсурсаў.

Унутры дэмсіл узмацняецца кадравы голад. З Каардынацыйнай Рады і Аб’яднанага Пераходнага Кабінета зыходзіць прадстаўніца па нацыянальным адраджэнні Аліна Коўшык. Тым не менш, дэмсілы змаглі паўплываць на захаванне падтрымкі тэлеканала “Белсат”, хаця і са значнымі скарачэннямі.

Такім чынам, у дэмсілах працягваюць скарачацца рэсурсы, што ўзмацніць напружанасць сярод палітарганізацый у спробах іх пераразмеркавання.