Дэмакратычныя сілы: праз Варшаву ў Брусэль

Дэмакратычныя сілы разлічваюць павялічыць увагу Брусэля да Беларусі падчас паўгадавога старшынства Варшавы ў Еўрасаюзе. Скандал у сувязі з узломам тэлеграм-акаўнта намесніка па пытаннях абароны і нацыянальнай бяспекі Кабанчука наўрад ці паўплывае на кадравыя перастаноўкі ў Кабінеце Ціханоўскай.  Аднак прыхільнікі дээскалацыі адносін з рэжымам працягваюць павялічваць уплыў у інфармацыйным парадку дня.

Дэмсілы ўзмацняюць камунікацыю з польскім істэблішментам. Святлана Ціханоўская правяла перамовы са спікерам Сената Малгажатай Кідава-Блоньскай, а таксама прэм’ерам Дональдам Тускам. Прэзідэнт Польшчы Анджэй Дуда прыняў удзел у калядна-навагодняй сустрэчы з Ціханоўскай і беларусамі. Гэтыя стасункі дазволяць дэмсілам захаваць увагу на еўрапейскім узроўні да Беларусі на працягу паўгадавога старшынства афіцыйнай Варшавы ў ЕС. У дэмсілаў пашыраецца акно магчымасцяў для прасоўвання інтарэсаў беларускага грамадзянскага сектара і адзінага парадку дня на еўрапейскім узроўні.

Камунікацыя з Захадам дазваляе захоўваць падтрымку грамадзянскай супольнасці, а таксама, напрыклад, спрыяе развіццю беларускага бізнесу ў Польшчы. У сваю чаргу гэтыя крокі дапамагаюць дэмсілам утрымліваць адзінства і падтрымку прыхільнікаў у чаканні “акна магчымасцяў” для дэмакратычнага транзіту ў Беларусі.

Дэмсілы паспяхова пашыраюць пазіцыю наконт дэлегітымізацыі Лукашэнкі ў заходніх сталіцах. Так, парламентарыі ЗША, Італіі, Іспаніі, Літвы, Польшчы, Украіны і Эстоніі, як і парламент Літвы, МЗС Эстоніі, ужо заявілі аб непрызнанні “выбараў” у Беларусі.

З іншага боку, Латвія плануе ўзмацніць жорсткасць правіл уезду і знаходжання ў краіне для беларусаў. Гэта стварае новыя выклікі для дэмсілаў у справе абароны інтарэсаў сваіх прыхільнікаў у Латвіі

Кабінет Ціханоўскай нясе рэпутацыйныя страты ў сувязі з чарговым скандалам. Узлом акаўнта ў Telegram прадстаўніка па абароне і нацбяспецы Вадзіма Кабанчука шырока абмяркоўваецца ў беларускай медыяпрасторы. Гэта гісторыя негатыўна адбіваецца на даверы да любых ініцыятыў грамадзянскай супольнасці.

Дыскусія наконт вызвалення палітзняволеных у асяроддзі дэмсіл узмацняецца, як і спрэчкі адносна перагляду санкцыйнай рыторыкі ў дачыненні да рэжыму Лукашэнкі. Кіруючы клас уплывае на парадак дня грамадзянскай супольнасці праз кампанію па памілаваннях і падвышэнне ролі перабежчыкаў дэмсіл у кантактах з палітзняволенымі. Частка дэмсіл разглядае гэтыя дзеянні як гатоўнасць да дээскалацыі палітычнага канфлікту.

Такім чынам, дэмсілы могуць падвысіць увагу заходніх сталіц да Беларусі разам з прасоўваннем агульнага парадку дня па падтрымцы грамадзянскай супольнасці і ізаляцыі рэжыму Лукашэнкі.