Дэмакратычныя сілы: лакальныя перамогі на фоне фэйла з палітзняволенымі
![Дэмакратычныя сілы: лакальныя перамогі на фоне фэйла з палітзняволенымі](https://belarusinfocus.pro/wp-content/uploads/2024/08/board.jpg)
Дэмакратычныя сілы дэманструюць лакальныя дыпламатычныя перамогі на фоне згасання ўвагі да Беларусі. У той жа час ігнараванне беларускага пытання падчас абмену палітзняволенымі між Расіяй і Захадам грамадства ўспрыняла як правал высілкаў Офіса Святланы Ціханоўскай. Аднак Офіс захоўвае лідарства ў фармаванні агульнага парадку дня дэмакратычнага руху і кансалідацыі палітарганізацый.
Дэмакратычныя сілы вымушаны публічна прызнаваць фіяска ў камунікацыі з заходнім істэблішментам у дачыненні да вызвалення палітзняволеных. Выглядае, што інтэнсіўныя кантакты беларускіх дэмакратычных лідараў не ўплываюць на дзеянні заходніх сталіц па гэтаму адчувальнаму для грамадства пытанню. Ігнараванне беларускага парадку дня ў абменным працэсе ўзмацняе крытыку ў дачыненні да дзейнасці дэмсіл. Адпаведна, зніжаецца ўзровень падтрымкі гэтых палітыкаў сярод прыхільнікаў перамен. Гэта тлумачыцца яшчэ і тым, што працяглы час пытанне вызвалення палітзняволеных называлася прыярытэтным у парадку дня шырокай кааліцыі Ціханоўскай.
У выніку галасы крытыкаў Офіса Ціханоўскай узмацняюцца. Экс-спікер Каардынацыйнай Рады Андрэй Ягораў прапануе мяняць палітвязняў на легітымнасць рэжыму. Для параўнання, мэйнстрымавымі падыходамі кааліцыі Ціханоўскай з’яўляюцца дэлегітымізацыя і ізаляцыя рэжыму Лукашэнкі. Дарэчы, з такім прыярытэтам у працы пагадзіўся цэлы шэраг палітарганізацый, што замацавала прыняцце “Платформы 2025”.
Напружанасць у асяроддзі добраахвотнікаў, якія ваююць ва Украіне, захоўваецца. Частка вайскоўцаў інтэгруецца ў мэйнстрым дэмакратычнага руху. Адзін з заснавальнікаў руху “Каліноўцы” Вадзім Кабанчук заняў пасаду прадстаўніка па абароне і нацыянальнай бяспецы Аб’яднанага Пераходнага Кабінета. Хутчэй за ўсё, з гэтым таксама звязана адстаўка Валерыя Сахашчыка, у якога не склаліся адносіны з прадстаўнікамі палка Каліноўскага.
Пры гэтым полк Каліноўскага застаецца ўбудаваным у іерархію ўзброеных сіл Украіны і захоўвае вайсковую субардынацыю. У сваю чаргу грамадска-палітычны рух “Каліноўцы” з’яўляецца аўтаномнай арганізацыяй, якая трымае дыстанцыю ад палка Каліноўскага (і, адпаведна, УСУ), а таксама збліжаецца з дэмсіламі на чале з Ціханоўскай. Варта зазначыць: паміж Ціханоўскай і кіраўніцтвам Украіны захоўваюцца прахалодныя адносіны, што звязана з пазіцыяй афіцыйнага Кіева.
У Кабінеце адбыўся яшчэ шэраг змен. Аднак наўрад ці гэтыя кадравыя змены істотна паўплываюць на рост даверу да дэмсілаў на фоне ігнаравання беларускага боку падчас абмену паміж Расіяй і заходнімі краінамі.
Такім чынам, кааліцыя Ціханоўскай пакуль што дамагаецца кансалідацыі вакол свайго парадку дня большасці дэмакратычных палітарганізацый.
Падпішыцеся на нашу рассылку
Сітуацыя ў Беларусі