Дэмакратычныя сілы: дыверсіфікацыя рызык у стасунках з Захадам

Палітычныя арганізацыі адмаўляюцца ад мабілізацыі актывістаў на перыяд прэзідэнцкай кампаніі. Гэта звязана з узмацненнем рэпрэсій і імкненнем захаваць актыў унутры краіны. Аднак дэмакратычныя сілы актыўна адстойваюць свой парадак дня– ізаляцыя рэжыму і непрызнанне выбараў Лукашэнкі — у камунікацыі з замежнымі партнерамі. 

Дэмакратычныя сілы павялічваюць узаемадзеянне з заходнімі палітыкамі ў рамках агульнаеўрапейскіх інстытутаў. Гэта — вынік дыпламатычных высілкаў і камунікацыі лідаркі дэмакратычнай Беларусі Святланы Ціханоўскай з заходнімі партнерамі. Рада Еўропы пашырае супрацу з дэмсіламі і грамадзянскай супольнасцю. Дэлегацыя Каардынацыйнай Рады ўпершыню возьме ўдзел у сесіі ПАРЕ. Гэта дазволіць дэмсілам падтрымліваць увагу да Беларусі з прасоўваннем свайго парадку дня. 

Дыпламатычныя захады дэмакратаў па ізаляцыі рэжыму і непрызнанні новага мандата Лукашэнкі прыносіць плен. Парламентарыі Чэхіі заявілі пра нелегітымнасць прэзідэнцкіх выбараў 2025 года ў Беларусі.

Кааліцыя Ціханоўскай намагаецца зменшыць рызыкі перагляду палітыкі ў дачыненні да Беларусі. Дэмсілы імкнуцца падтрымліваць сувязь з рознымі палітычнымі сіламі ў ЗША і краінах Еўропы. Гэта дазваляе сфармаваць міжпартыйны кансэнсус у заходніх сталіцах па стаўленню да Беларусі.

Ціханоўская і прэзідэнт Германіі абмеркавалі будучыню Еўропы пасля змены ўлады ў ЗША.

На Форуме “Будучыня дэмакратыі” ў Вільні лідарка дэмакратычнай Беларусі заклікала прытрымлівацца паслядоўнай палітыкі ізаляцыі ў дачыненні да Лукашэнкі. У мерапрыемстве прынялі ўдзел літоўскія палітыкі і дыпламаты, грамадскія дзеячы, праваабаронцы, прадстаўнікі Еўрасаюза і Польшчы.

Кандыдат на пасаду прэм’ер-міністра Літвы ад сацыял-дэмакратаў крытычна выказаўся аб абмежаваннях у адносінах да беларускіх эмігрантаў.

Камунікацыя дэмсіл з урадамі еўрапейскіх краін прыносіць плен у адстойванні беларускіх інтарэсаў. Данія пачала выдаваць пашпарты іншаземца беларускім палітэмігрантам, а яшчэ раней прызнала пратэрмінаваныя беларускія пашпарты. Ціханоўская абмяркоўвала гэтае пытанне з дацкімі чыноўнікамі у траўні 2024 года.

Такім чынам, дэмсілы захоўваюць адзіны парадак дня ў камунікацыі з заходнімі сталіцамі. Гэта дазваляе кааліцыі Ціханоўскай адстойваць інтарэсы грамадзянскай супольнасці і сімпатызантаў у эміграцыі.