Дэмакратычныя сілы дасягаюць поспеху ў дачыненнях з ЗША, Польшчай і Літвой, уплыў грамадзянскай супольнасці ў Беларусі скарачаецца

Дэмсілы працягваюць узмацняць свой уплыў на выпрацоўку заходнімі сталіцамі (Вашынгтон, Варшава, Вільня) адносін у дачыненні да афіцыйнага Мінска, а таксама падтрымку грамадзянскай супольнасці. Пратэсны рух у Беларусі працягвае звужацца, але асобныя падпольныя акцыі ў рэгіёнах не спыняюцца на фоне маштабных рэпрэсій.

Святлана Ціханоўская выступіла ў Кангрэсе ЗША з прасоўваннем тэматыкі ізаляцыі і міжнароднага трыбунала над рэжымам Лукашэнкі, актуалізацыі еўрапейскага выбару і скасавання інтэграцыйных праектаў з Расіяй. У Кангрэсе пачалася праца над новым законам аб дэмакратыі, суверэнітэце і правах чалавека ў Беларусі. Вашынгтон прызначыць спецпасланнікаў для працы з дэмакратычнымі сіламі Беларусі.

Прэзідэнт ЗША Джо Байдэн высока ацаніў выступленне лідара дэмакратычнай Беларусі Святланы Ціханоўскай і жонкі нобелеўскага лаўрэата Алеся Бяляцкага Наталлі Пінчук на II Саміце за дэмакратыю, які праходзіў у Вашынгтоне.

Пасля абмеркавання з беларускай дыяспарай і Святланай Ціханоўскай польскі ўрад вырашыў бясплатна выдаваць беларусам праязны дакумент замежніка.

Грамадзянская супольнасць і дэмакратычныя сілы дабіваюцца карэктавання абмежавальных захадаў у адносінах да грамадзян Беларусі з боку Літвы. У літоўскім Сейме змянілі законапраект пра абмежаванні для беларусаў і расіян. Аб’яднаны Кабінет працягвае кансультацыі з літоўскім урадам аб выдачы беларусам ВНЖ.

Кабінет Святланы Ціханоўскай спрабуе павялічыць раскол сярод кіруючага класа (асабліва вайскоўцаў) і ўзмацніць антываенны рух у Беларусі пасля анансаваных Крамлём намераў размясціць ядравую зброю на тэрыторыі Беларусі.

Актывісты пратэснага руху ў рэгіёнах працягваюць асобныя партызанскія акцыі супраціву і нязгоды, нягледзячы на маштабныя арышты і ператрусы.

Варта зазначыць, што сярод насельніцтва могуць, наадварот, пашырацца прарасійскія настроі з-за паступовай ізаляцыі беларусаў, абмежавальных захадаў на заходніх межах краіны, скарачэння ўплыву незалежных медыя на аўдыторыю і пашырэння ўплыву крамлёўскіх медыя, у тым ліку з-за сінхранізацыі павесткі дзяржаўных ідэолагаў з расійскай прапагандай.

Нягледзячы на крыміналізацыю грамадскай актыўнасці і пераслед, жыхары працягваюць ініцыяваць петыцыі і пратэсныя кампаніі ў адказ на непапулярныя захады мясцовых уладаў. Да актывістаў, якія збіраюць подпісы супраць будаўніцтва ў Мінску новага цэху фабрыкі “Камунарка”, прыйшлі з ператрусамі.

Такім чынам, уплыў дэмсіл на ўнутрыбеларускую павестку працягне скарачацца разам з звужэннем іх аўдыторыі.