Дэмакратычныя сілы ўзмацняюць міжнародны ціск на рэжым, Кабінет Ціханоўскай ініцыюе маштабную акцыю ў падтрымку Украіны

Дэмсілы актывізуюць кампанію па пазбаўленні легітымнасці рэжыму Лукашэнкі на міжнародным узроўні, ініцыяванні міжнароднага пераследу за рэпрэсіі і саўдзел у крамлёўскай агрэсіі супраць Украіны. Лідар дэмакратычнай Беларусі дабіваецца поспехаў ва ўсталяванні ўзаемадзеяння з украінскай дэлегацыяй у ПАСЕ.

Лідар дэмакратычнай Беларусі Святлана Ціханоўская выступіла ў АБСЕ з жорсткай крытыкай рэжыму Лукашэнкі, выказала салідарнасць з народам Украіны і акцэнтавала ўвагу міжнароднай супольнасці на рэпрэсіях у Беларусі.

Актыўная камунікацыя дэмакратычных сіл з заходнімі сталіцамі з прасоўваннем сваёй павесткі прыносіць плён. ЕС уключыў Беларусь у лік прыярытэтаў сваёй палітыкі па прасоўванні правоў чалавека на 2023 год. Еўракамісія разглядае пытанні, звязаныя з пашпартамі новай Беларусі.

Ціханоўская прапанавала стварыць пры ЕС рабочую групу па кантролі за выкананнем санкцый. АПК спрабуе перадухіліць зняцце персанальных санкцый з бізнесоўцаў з асяроддзя Лукашэнкі, якія адказваюць за калійную галіну.

Спецпрадстаўнік Эстоніі па беларускіх дэмсілах Марка Каплімаа пачаў працу ў Літве.

Святлана Ціханоўская захоўвае лідарскія пазіцыі і разглядаецца прыхільнікамі перамен у якасці першачарговага прадстаўніка Беларусі на перамовах з Украінай.

У выніку актыўнай камунікацыі шырокая кааліцыя дэмсіл на чале з Ціханоўскай і ўкраінская дэлегацыя ў ПАСЕ дамовіліся аб супрацоўніцтве на міжнароднай арэне.

Дэмакратычныя сілы ініцыявалі маштабную акцыю з антываеннымі мітынгамі па ўсім свеце на гадавіну нападзення Расіі на Украіну. Акцыі беларусаў у падтрымку Украіны адбыліся не толькі па ўсім свеце, а і ў Беларусі, нягледзячы на несупынныя жорсткія рэпрэсіі ахоўнікаў рэжыму ў адносінах да актывістаў антываеннага руху.

АПК спрабуе наладзіць камунікацыю з вайскоўцамі ў Беларусі і пашырыць сярод іх антываенныя настроі. Аднак напярэдадні Лукашэнка ўзмацніў жорсткасць пакарання за здраду дзяржаве, што ўскладняе кантакты дэмсіл з вайскоўцамі і чыноўнікамі.

Каардынацыйная рада спрабуе павялічыць свой уплыў на інфармацыйную павестку пасля пашырэння складу і, хутчэй за ўсё, некалькі павялічвае падтрымку і давер з боку прыхільнікаў перамен.

Партызаны з Аб’яднанага штаба супраціўлення атакуюць анлайн-інфраструктуру дзяржаўных органаў, аднак атака абмяжоўваецца Нацыянальным прававым інтэрнэт-парталам Рэспублікі Беларусь.

У асяроддзі апазіцыйных палітычных партыяў ідзе абмеркаванне аб перарэгістрацыі ў сітуацыі несупынных рэпрэсій у адносінах да актывістаў дэмакратычнага руху, у тым ліку партыйцаў.

Такім чынам, дэмакратычныя сілы працягнуць прытрымлівацца жорсткай рыторыкі ў адносінах да рэжыму Лукашэнкі з ягонай дэлегітымізацыяй на міжнародным узроўні ў адказ на жорсткія рэпрэсіі і адмову ад дыялогу з грамадствам.