Ціханоўская ўзмацняе супрацу з НАТО, аўдыторыя дэмсіл звужаецца

Кааліцыя Ціханоўскай павялічвае ўзровень камунікацыі з заходнімі партнёрамі – чальцамі НАТО. Аднак аўдыторыя дэмсіл у Беларусі працягвае звужацца, у тым ліку з-за дэпалітызацыі грамадства. Напружаная сітуацыя паміж сілавікамі з дэмакратычнага руху захоўваецца, што стварае адмоўны медыйны фон сярод спажыўцоў незалежных медыя. 

Пазіцыі сілавікоў у дэмакратычным руху слабеюць, хаця папулярнасць сілавога сцэнару змены ўлады сярод дэмакратычнага ядра захоўваецца на высокім узроўні. ByPol абвясціў пра аднаўленне працы пасля чэрвеньскага крызісу. Частка былых сілавікоў з ByPol пераназвалася ў BELPOL. Публічныя абвінавачванні і раскол сярод сілавікоў аднолькава адмоўна ўплываюць на давер да арганізацый сярод шырокай аўдыторыі прыхільнікаў перамен.

Каардынацыйная рада спрабуе стаць адным з медыятараў вырашэння крызісу паміж сілавікамі з ByPol. КР прапануе сфармаваць працоўную групу для правядзення слуханняў па выніках дзейнасці прадстаўніка АПК па аднаўленні законнасці і правапарадку.

Дэмсілы працягваюць нарошчваць міжнародны ціск на рэжым Лукашэнкі.

Падчас візіту ў Італію Святлана Ціханоўская папрасіла Сенат Італіі дапамагчы са стварэннем трыбуналу над Лукашэнкам, а таксама сустрэлася з прэм’ер-міністрам Джорджай Мелоні. У выніку Італія таксама накіруе ў Мінск часовага паверанага замест амбасадара, а таксама працягне выдачу візаў для беларусаў і падтрымкі грамадзянскай супольнасці.

Ціханоўская таксама атрымала запрашэнне на ўдзел у Публічным форуме НАТА і выступіць на саміце. Акрамя таго, дэмакратычныя сілы арганізоўваюць два два сайд-івэнты з абмеркаваннем ролі Беларусі для трансатлантычнай бяспекі і размяшчэння ядравай зброі ў Беларусі.

З аднаго боку, пазіцыі і ўплыў дэмакратычных сіл на міжнародны парадак дня ў адносінах да Беларусі ўзмацняюцца. З іншага, існуюць рызыкі звужэння аўдыторыі кааліцыі Святланы Ціханоўскай сярод беларускай аўдыторыі. Большасць беларусаў прыхільна ставіцца да Расіі і АДКБ. Прыхільнікаў уступлення ў блок НАТО сярод беларусаў ніколі не было шмат. Напрыклад, згодна з апытаннямі Беларускай аналітычнай майстэрні Андрэя Вардамацкага падтрымка саюзу з Еўразвязам сярод беларусаў складае каля 20-25%, а уваход у блок НАТА падтрымліваецца каля 5%.

У выніку ціску дэмсіл і міжнародных партнёраў кіруючы клас вымушаны ісці насустрач патрабаванням грамадзянскай супольнасці і дэманстраваць знакавых палітзняволеных. Праўладны тэлеграм-канал апублікаваў відэа з Сяргеем Ціханоўскім.

Фандрайзінгавыя ініцыятывы мабілізуюць дыяспару дзеля збору сродкаў для падтрымкі палітзняволеных. Беларусы за суткі сабралі грошы на лекаванне і рэабілітацыю актывісту з Бярозаўкі.

Такім чынам, у дэмакратычных арганізацыях павялічваецца ўнутраная напружанасць і тэндэнцыі да драблення ў выніку звужэння аўдыторыі і барацьбы за рэсурсы.