Ціханоўская ўмацоўвае кантакты з Дублінам, дэмсілы дабіваюцца міжнароднага трыбуналу над Лукашэнкам

Лідар дэмакратычнай Беларусі прасоўвае агульнадэмакратычную павестку ў Дубліне на сустрэчы з кіраўніцтвам Ірландыі. Дэмсілы збіраюць доказы злачынстваў рэжыму супраць беларускага і ўкраінскага народаў, а таксама працягваюць кампанію па ініцыяванні трыбуналу над рэжымам Лукашэнкі. Грамадзянская супольнасць працуе над стварэннем альтэрнатыўнага пашпарта для беларусаў у выгнанні і ўзмацненнем нацыянальнай ідэнтычнасці.

Грамадзянская супольнасць арганізоўвае кампанію ціску на ахоўнікаў рэжыму наконт катаванняў і жорсткага абыходжання з палітзняволенымі. Незалежныя медыя і актывісты звяртаюцца ў пракуратуру наконт сітуацыі з экс-прэтэндэнтам у прэзідэнты Віктарам Бабарыкам.

Дэмсілы распачынаюць падрыхтоўку да мабілізацыі беларусаў-эмігрантаў на акцыю падтрымкі палітзняволеных 21 мая. Дыяспары разлічваюць прыцягнуць увагу замежных сталіц і міжнародных інстытуцый да сітуацыі з палітвязнямі і павялічыць ціск на рэжым Лукашэнкі.

ІТ-праект “Новая Беларусь” працягвае развіваць анлайн сэрвісы і разбудоўваць анлайн-інфраструктуру грамадзянскай супольнасці, а таксама ўмацоўваць нацыянальную ідэнтычнасць беларусаў. Праект у кааперацыі з Кабінетам Святланы Ціханоўскай працуе над стварэннем альтэрнатыўнага пашпарта і адказвае за тэхнічны бок лічбавага ID.

НАУ збірае доказы дачынення рэжыму Лукашэнкі да вывазу ўкраінскіх дзяцей з акупаваных Расіяй тэрыторый і кантактуе з украінскай пракуратурай і Міжнародным крымінальным судом у Гаазе.

Святлана Ціханоўская сустрэлася ў Дубліне з кіраўніцтвам краіны, у тым ліку з прэзідэнтам, прэм’ерам і спікерам парламенту, а таксама з іншымі афіцыйнымі асобамі з прасоўваннем агульнай дэмакратычнай павесткі: дапамога палітвязням, падтрымка беларускіх ініцыятываў, спрашчэнне візавых і міграцыйных працэдураў. У выніку місія парламента Ірландыі прыбудзе ў Вільню і Варшаву, каб падрыхтаваць даклад па сітуацыі ў Беларусі.

У Літве прадстаўнікі кааліцыі Ціханоўскай узмацняюць узаемадзеянне з міністэрствам унутраных спраў у рамках працоўнай групы па пытаннях міграцыі і грамадскай бяспекі ў Літве.

Такім чынам, дэмсілы ўзмацняюць жорсткасць рыторыкі ў адносінах да рэжыму Лукашэнкі, а сярод дэмакратычнага ядра пераважаюць ультыматыўныя пазіцыі ў адказ на несупынныя рэпрэсіі і катаванні палітзняволеных.